Оштетен нафтовод во Хрватска, истекле 500.000 литри нафта

Половина милион литри нафта истекле од нафтовод во Хрватска, на делницата меѓу Сисак и Славонски Брод, соопшти компанијата „Јадрански нафтовод“ (ЈАНАФ). Досега се собрани околу 200.000 литри, а од компанијата уверуваат дека нема опасност за населението и снабдувањето со вода за пиење.

— реклама —

Инцидентот се случил во близина на селото Првча, на 88. километар од нафтоводот, откако при изведување работи за обновување била оштетена опрема по контакт со работна машина. Работите ги изведувала надворешна компанија, а истекувањето траело од петокот до синоќа.

— реклама —

Веднаш по откривањето на оштетувањето, транспортот на нафта бил прекинат со затворање на блокадните станици Окучани и Лужани. На терен била испратена механизација за ископување, чистење и собирање на истечената нафта.

Од ЈАНАФ посочуваат дека непријатната миризба засега е ограничена на погоденото подрачје и постепено ќе се намалува со текот на санацијата. Собирањето на преостанатата нафта ќе продолжи во наредните денови, по што таа ќе биде вратена во системот на компанијата.

— реклама —

Следната фаза ќе опфати отстранување и замена на загадената почва и враќање на теренот во првобитната состојба. Од компанијата очекуваат целосната санација да заврши за околу десет дена.

— реклама —

Одговорноста за инцидентот дополнително ќе биде утврдена, додека нафтоводот засега останува затворен.