Осма жртва од западнонилска треска во Македонија: Почина 70-годишен жител на Драчево

Западнонилската треска ја однесе осмата жртва во Македонија. Станува збор за 70-годишен жител на скопско Драчево, кој подолг период се лекувал на Клиниката за инфективни болести и фебрилни состојби.

— реклама —

Информацијата за Телевизија 24 ја потврдил министерот за здравство Сашко Клековски. Од Клиниката информираат дека пациентот имал повеќе коморбидитети, а леталниот исход настапил во текот на вчерашниот ден.

— реклама —

„Пациентот се лекуваше на Клиниката за инфективни болести и фебрилни состојби, а леталната состојба настана во текот на вчерашниот ден. Пациентот беше со повеќе коморбидитети. Повеќе информации ќе бидат објавени во текот на утрешниот ден“, велат извори од Клиниката за инфективни болести.

Драчево е меѓу подрачјата во Скопје каде што граѓаните пријавуваат зголемено присуство на комарци. Дел од жителите сметаат дека не се преземени доволно мерки за заштита, додека други велат дека надлежните активно постапуваат на терен.

— реклама —

Според последните информации наведени од Телевизија 24, во Институтот за јавно здравје се испитуваат и нови сомнителни случаи. Досега се потврдени 56 случаи на западнонилска треска и осум смртни случаи, што е повеќе од вкупниот број регистрирани случаи во Македонија во последните десет години, според податоците објавени во прилогот.

— реклама —

Меѓу најпогодените скопски општини се Кисела Вода, Бутел и Аеродром. Македонија, според прилогот, е меѓу најпогодените земји во регионот според бројот на заразени и починати лица во однос на бројот на жители.