Висок советник на Меланија Трамп откри зошто првата дама на САД пред речиси три месеци одржа неочекувано јавно обраќање во кое негираше каква било поврзаност со осудениот сексуален престапник Џефри Епстин.
Во изјава за „Политико“, Марк Бекман рече дека целта на обраќањето била јавно да се стави до знаење дека Меланија Трамп никогаш не била поврзана со Епстин, како и да ја изрази својата поддршка за жртвите.
Според него, таа истовремено го повикала Конгресот да им овозможи на жртвите официјално да сведочат под заклетва.
Во своето обраќање, Меланија Трамп изјави дека сите тврдења што ја поврзуваат со Епстин треба да престанат. Таа негираше дека имала каква било врска со него или со Гислејн Максвел и нагласи дека со Доналд Трамп се запознала случајно на забава во Њујорк во 1998 година, а не преку Епстин.
Таа наведе дека со Епстин кратко се сретнала во 2000 година и дека подоцна само повремено присуствувала на исти забави, но истакна дека никогаш немала сознанија за неговите злосторства и дека не била вклучена во какви било активности поврзани со него.
По нејзиниот говор, повеќе од десет жртви на Епстин испратија заедничко писмо во кое ја обвинија дека одговорноста ја префрла врз жртвите наместо врз американското Министерство за правда.
Инаку, ниту Доналд Трамп ниту Меланија Трамп не се обвинети за какво било кривично дело поврзано со случајот на Џефри Епстин.
