Најновото продолжение на популарната франшиза „Grand Theft Auto“, GTA 6, ќе чини 79,99 долари за стандардното издание, додека премиум верзијата ќе биде достапна по цена од 99,99 долари, објави компанијата Rockstar Games, пренесува Би-Би-Си.
Од компанијата соопштија и дека физичките копии на играта нема да содржат диск. Наместо тоа, во кутијата ќе се наоѓа код за дигитално преземање на играта.
По објавата, дел од фановите го доведоа во прашање значењето на купувањето физичка копија доколку во неа нема диск. Некои се прашуваат и дали ќе можат да ја препродаваат играта, како што е вообичаено со физичките изданија.
Сепак, цената од 79,99 долари, која е за 10 долари повисока од стандардните 70 долари за слични високобуџетни наслови, не предизвика толку големи реакции.
Преднарачките за GTA 6 ќе започнат на 25 јуни, а играта официјално ќе биде објавена на 19 ноември за конзолите PlayStation 5 и Xbox Series X/S.
Играчите кои ќе ги нарачаат дигиталните изданија однапред ќе можат да започнат со преземање на играта уште од 12 ноември, за да можат да играат веднаш на денот на излегувањето.
GTA 6 е една од најочекуваните игри во последните години. Нејзиниот претходник, GTA 5, беше објавен во 2013 година и досега има продадено речиси 230 милиони примероци ширум светот.
Новата игра ќе ја донесе и првата женска главна протагонистка во 3Д опкружување – Лусија, која заедно со Џејсон ќе биде еден од двата главни лика во приказната.
