Вонредна инспекциска контрола беше спроведена во раните утрински часови кај Бит-пазар, во координирана акција на Агенцијата за храна и ветеринарство, комуналните инспектори на Град Скопје, Државниот пазарен инспекторат и припадници на Министерството за внатрешни работи.
Контролата била насочена кон дивите продавачи на земјоделски производи кои биле поставени долж булеварот „Крсте Петков-Мисирков“, на потегот од трговскиот центар „Мавровка“ до Бит-пазар.
Во акцијата биле отстранети сите диво поставени тезги, од кои најголем дел биле наменети за продажба на овошје и зеленчук. Инспекциските служби одзеле околу 500 килограми храна, главно земјоделски производи, а била отстранета и целокупната опрема за продажба поставена на пешачките и велосипедските патеки.
Од Агенцијата за храна и ветеринарство информираат дека во координација со комуналните инспектори на Град Скопје, против сторителите ќе бидат преземени соодветни прекршочни мерки.
Во одвоена акција, спроведена вчера во соработка со СВР Гостивар, официјални ветеринари на Агенцијата за храна и ветеринарство на приватен имот во селото Чајле заплениле 150 килограми месо со изминат рок, без декларација и со непознато потекло.
Месото било нештетно уништено на депонијата „Русино“.
