Општина Центар ги отстрани бесправно поставените објекти на влезот во Старата скопска чаршија, со што е ослободен еден од најфреквентните делови во овој дел од градот.
Акцијата била спроведена во текот на ноќта по наредба на овластен градежен инспектор од Секторот за инспекциски работи, по претходно извршен вонреден надзор. По донесеното решение, лицата самостојно ги демонтирале тезгите во доцните вечерни часови.
Со интервенцијата е расчистен просторот кој подолг период бил исполнет со импровизирани штандови за продажба на бижутерија и сувенири, што го нарушувале изгледот и го отежнувале движењето на пешаците.
Градоначалникот Горан Герасимовски изјави дека ќе продолжат контролите и постапувањето против бесправно поставени објекти, со цел заштита на јавниот простор и културно-историското наследство.
Акцијата е реализирана со поддршка на Град Скопје и јавните претпријатија, а од Општината најавуваат засилени инспекциски контроли и во наредниот период.
