ОУ „Братство“ добива нова спортска сала вредна 64 милиони денари, ќе има трибина со 400 седишта

Во основното училиште „Братство“ во Општина Карпош започна изградбата на нова повеќенаменска спортска сала, инвестиција вредна 64 милиони денари, обезбедени од Владата преку повикот за финансирање капитални проекти на општините.

— реклама —

Камен-темелникот на новиот објект го поставија премиерот Христијан Мицкоски, министерката за образование и наука Весна Јаневска и градоначалникот на Општина Карпош, Сотир Лукровски.

— реклама —

Салата ќе се простира на 1.400 квадратни метри и ќе има трибина со капацитет од 400 седишта. Според најавите, објектот треба да биде завршен за околу една година и ќе може да се користи не само за потребите на училиштето, туку и за официјални натпревари, тренинзи, спортски и културни настани, како и за други намени.

Јаневска информираше дека во општините низ државата во моментов се реализираат околу 70 инфраструктурни проекти во областа на образованието. Дел од нив се финансирани преку Министерството за образование и наука, а дел преку владината поддршка за капитални проекти на локалните самоуправи.

— реклама —

Во Општина Карпош, преку Министерството, се прошируваат и капацитетите на ООУ „Димо Хаџи Димов“ со доградба на шест училници, додека наскоро треба да започне и доградбата на четири училници во ООУ „Петар Поп Арсов“. Целта е да се создадат услови за организирање настава во една смена.

„Инфраструктурата, заедно со учебниците, наставните програми и мотивиран наставен кадар, се основни предуслови за квалитетно образование“, порача Јаневска.