Кина годинава ќе ја финализира купопродажбата на 200 авиони „Боинг“, а овој договор претставува само почетна фаза од потенцијално многу поголем договор, изјави извршниот директор на американската компанија Кели Ортберг.
Ортберг истакнал дека неодамнешната посета на Кина, на која присуствувал заедно со американскиот претседател Доналд Трамп, била многу успешна и овозможила повторно отворање на кинескиот пазар за теснотрупни авиони на „Боинг“, по речиси една деценија застој предизвикан од трговските тензии меѓу Вашингтон и Пекинг.
„Тоа е добар почеток и верувам дека ќе следуваат дополнителни нарачки“, изјавил Ортберг.
Според извор запознаен со преговорите, договорот за 200 авиони претставува нова зделка и не вклучува претходно ненарачани авиони, додека деталите за роковите за испорака сè уште не се потврдени.
Се очекува авионите да бидат распределени меѓу трите најголеми кинески државни авиокомпании – „Ер Чајна“, „Чајна Истерн ерлајнс“ и „Чајна Саутерн ерлајнс“.
