Сместувачките капацитети во хотелите на Охридско-струшкото крајбрежје се целосно исполнети за новогодишните празници, инфорира претседателот на ХОТАМ Крсте Блажески. Традиционално, според него гостите ќе бидат од Бугарија, Грција и Албанија и дел од Србија и Црна Гора.
-Последните години интересот е многу голем кај гостите од Бугарија. Ние сме сакана дестинација, но и евтина дестинација. Не е само за Нова година, туку и преку цела година. Повеќето хотели се полни. Има некои мали хотели кои не можат да примаат поголеми групи и продаваат соба по соба, изјави Блажески за МИА.
Блажески потенцираше дека добро помина и измината туристичка сезона на Охридско-струшката ривиера, со зголемување на бројот на туристи во однос на 2017 година. Имало и период кога сместувачките капацитети на крајбрежјето биле исполнети до последното легло.
Инаку во Охрид групи туристи се шетаат и овој перид. Ги имаа од Холандија, Полска, Израел, Норвешка ,Турција, Кина и Јапонија, а годинва за Охрид интерес покажаа и Белгијците.
За подобра туристичка сезона, позитивна слика кај туристите, но и нивната безбедност, првиот човек на хотелиерите на Македонија, смета дека е потребно итензивирање на работата на автопатот Кичево – Охрид, со акцент на забрзување на градежните работи од Охридскиот аеродром до Охрид и Струга.
