„Охридскиот Регион останува на Листата на светско наследство на УНЕСКО“, вели Муцунски

Охридскиот Регион останува на Листата на светско наследство на УНЕСКО и во оваа фаза нема да биде впишан на Листата на светско наследство во опасност, соопшти министерот за надворешни работи и надворешна трговија, Тимчо Муцунски, на тематска прес-конференција во Владата по завршувањето на 48. сесија на Комитетот за светско наследство на УНЕСКО во Бусан, Република Кореја.

Муцунски изјави дека во првичниот предлог на одлуката било предвидено Охридскиот Регион веднаш да биде впишан на Листата на светско наследство во опасност, но по усвојувањето на амандман таа формулација била отстранета.

— реклама —

„Ова претставува значаен дипломатски успех за државата. Резултатот произлегува од координирана државна акција, предводена од претседателот на Владата, и од посветената работа на сите институции вклучени во процесот“, изјави Муцунски.

— реклама —

Тој посочи дека во активностите биле вклучени повеќе институции, меѓу кои Министерството за култура и туризам, Министерството за транспорт, Министерството за животна средина и просторно планирање, општините Охрид и Струга, како и Амбасадата во Париз, која имала важна улога во комуникацијата со УНЕСКО и државите членки на Комитетот.

Според министерот, во изминатиот период биле спроведени интензивни дипломатски разговори и консултации со цел да се обезбеди поддршка од земјите членки на Комитетот, при што биле претставени преземените обврски и определбата на државата за заштита на Охридскиот Регион.

— реклама —

Муцунски оцени дека Охридскиот Регион претставува природно и културно богатство од исклучителна универзална вредност и нагласи дека неговото зачувување останува национален приоритет. Тој додаде дека со дипломатскиот ангажман е обезбеден дополнителен период за исполнување на преземените обврски и за спроведување на Стратегискиот план за рехабилитација до 2030 година.

Во следниот период, Македонија и Албанија треба да подготват временски ограничена рамка за реализација на Планот, а до 1 февруари 2027 година до УНЕСКО да достават нов извештај за постигнатиот напредок.

„Дипломатијата го обезбеди потребниот простор. Сега обврската е на сите надлежни институции тој простор да го претворат во конкретни и мерливи резултати, преку целосно исполнување на преземените обврски“, порача Муцунски.