Ќе има ДДВ за пратките од „Тему“ и „АлиЕкспрес“, ама граѓаните нема да плаќаат повеќе
Ќе се воведе ДДВ на сите онлајн-пратки, но без дополнителен трошок за граѓаните. Ова е клучната порака по денешното изгласување на измените и дополнувањата на Законот за ДДВ во Собранието, со кои се укинува досегашното ослободување за пратки со вредност до 22 евра.Од Министерството за финансии објаснуваат дека граѓаните нема да плаќаат поскапо, бидејќи – како што нагласуваат – трошокот за пресметка и наплата на ДДВ не паѓа врз крајните потрошувачи. Тоа значи дека цените на пратките за купувачите треба да останат исти.Целта на измените, велат од Министерството, е зајакнување на домашната економија и пренасочување дел од прометот од странските платформи кон локалните компании.„Со укинувањето на ослободувањето, околу 4 милиони денари месечно – колку што во одредени периоди завршуваат кај странските онлајн-платформи – ќе се вратат во домашното стопанство,“ соопштуваат од институцијата.Од Министерството дополнително наведуваат дека мерката треба да донесе поголема конкурентност за локалните бизниси и отворање нови работни места.
Македонија | пред 1 месец