Обвинителот Коцевски соопшти детали за новите приведени во акцијата поврзана со случајот „Пулс“
Обвинителството отвори нов сегмент од истрагата поврзана со трагедијата во кочанската дискотека, а фокусот овој пат е насочен кон вработени во Управата за јавни приходи. Како што потврди денеска главниот јавен обвинител Љупчо Коцевски, вчера и денес се спроведуваат интензивни активности, вклучувајќи приведувања и претреси на лица опфатени со кривичната пријава.– „Јавноста беше запознаена дека се водеше предистражна постапка за лица вработени во Управата за јавни приходи. Денеска се приведени околу десетина лица и во моментов се вршат претреси на лицата опфатени со кривичната пријава. Во овој момент можам да кажам само дека се работи за вработени во УЈП, а за кривични дела допрва ќе видиме. Првичните сознанија се дека се работи за кривичните дела – злоупотреба на службена положба и овластување, како и примање и давање мито“, рече Коцевски.Обвинителот додаде дека во акцијата се користат и електронски комуникации како доказен материјал:– „Дел од тие комуникации што беа презентирани во јавноста, дел се опфатени. Меѓутоа дадена е изјава Обвинителството дека дел од тие електронски пораки се дадени во Судот. Меѓутоа, тоа беше само дел за тој предмет, а се поврзани и со овие лица. Ова е постапка во врска со предметот за Кочани“, истакна тој.Во моментов, како што нагласи Коцевски, не може да се откријат имињата на приведените.– „Јавноста ќе биде запознаена откако ќе се земат генералиите, а за мерките што ќе бидат предложени против приведените ќе биде донесена одлука откако ќе бидат земени изјавите од приведените“, додаде тој.Истрагата формално се води во Обвинителството во Кочани, бидејќи таму е извршено евентуалното кривично дело.– „Доколку излезе нешто ново, можеби тоа да биде преземено од Обвинителството за организиран криминал. Засега надлежно е Обвинителството во Кочани“, изјави Коцевски.Тој појасни дека овој предмет не може да се спои со истрагата за пожарот во дискотеката, бидејќи се работи за различни кривични дела:– „Се работи за кривични дела за злоупотреба на службена должност и овластување и земање и давање поткуп, односно што нема поврзаност на штетната последица. Се работи за кривични дела што немаат врска со предметот што е во тек за кривичниот настан во дискотеката во Кочани“, рече главниот јавен обвинител.Со ова, истрагата за трагичниот настан добива нова димензија и дополнителни институционални слоеви кои ќе се проверуваат во наредниот период.
Македонија | пред 2 седмици
