ГОРДАНА СИЉАНОВСКА ДАВКОВА

Наместо одговор каде се снимките кои се бараат пет месеци, МВР наброја што досега презело за шпионажата кај претседателката Сиљановска

Министерството за внатрешни работи не даде конкретен одговор каде се снимките од безбедносните камери од Вила Водно, кои Обвинителството за гонење организиран криминал и корупција ги бара со месеци во предметот за сомнежи за шпионажа и недозволени активности во Кабинетот на претседателката Гордана Сиљановска-Давкова.„Скопје1“ побара од МВР одговор дали снимките воопшто се обезбедени, зошто пет месеци не се доставени до обвинителството и зошто ОЈО ГОКК тврди дека нема добиено ниту повратна информација за преземените дејствија. Наместо директен одговор, од МВР само набројаа дел од активностите што ги преземаат во предметот.„Ве известуваме дека од страна на Секторот за компјутерски криминал при МВР се преземаат соодветни мерки и активности, односно одземени се компјутерска опрема и мобилни телефони. Во тек е анализа на сите електронски докази кои се екстрахирани од одземената опрема. Извршен е службен разговор со лица вработени во Кабинетот на Претседателот и за истите доставено е известување до ОЈО ГОКК. По целосно расчистување на случајот јавноста ќе биде соодветно известена“, велат од МВР за „Скопје1“.Претходно, „Скопје1“ објави дека повеќе од пет месеци, далеку од очите на јавноста, ОЈО ГОКК води предистражна постапка за сомнежи за недозволени активности во Кабинетот на претседателката во Вила Водно.Предметот бил отворен по известување од МВР – Сектор за компјутерски криминал, а според обвинителството, се однесува на „постоење индиции за преземени недозволени активности од висок државен интерес“.Според информациите од ОЈО ГОКК, постојат сомнежи дека доверливи електронски податоци од Кабинетот на претседателката биле неовластено преснимувани, а неофицијално се шпекулира дека дел од информациите можеле да завршат кај странски разузнавачки структури.Во рамки на постапката, обвинителството побарало судска наредба за пребарување на компјутерски систем, екстракција на податоци од компјутери и лаптопи, како и обезбедување на снимките од безбедносните камери во Вила Водно.„Дополнително, до Кабинетот на Претседателката беше упатено барање за доставување копии од видео записите од безбедносните камери поврзани со пријавениот настан, за периодот во кој истиот се случил“, соопштија од ОЈО ГОКК за „Скопје1“.Но, обвинителството наведува дека и по повеќе месеци не може да дојде до снимките.„На почетокот на 2026 година, по добиено известување дека Кабинетот на Претседателката не располага со копии од видео надзорот, бидејќи опремата е набавена преку СОЗР, а надлежноста за ракување и чување на записите е кај МВР, предметниот јавен обвинител се обрати и до СОЗР и до МВР за нивно итно обезбедување“, велат од обвинителството.Од СОЗР, според ОЈО ГОКК, било одговорено дека тие не располагаат со снимките, туку само ја набавиле опремата, додека чувањето и располагањето со записите било во надлежност на МВР.„И покрај тоа, од страна на МВР до денес не се доставени повратни информации, ниту известување за преземени дејствија во врска со обезбедувањето на копиите од видео надзорот“, додаваат од ОЈО ГОКК.Во март годинава, МВР доставило и два мобилни телефони одземени од пријавено лице кое работело во Вила Водно, по што обвинителството издало наредба за нивна екстракција и анализа.Неофицијално, сомнежите се дека вработен во Кабинетот на претседателката пристапувал до електронски податоци, ги копирал, енкриптирал и складирал на надворешни носачи на податоци, а случајот наводно бил откриен од друго ИТ лице кое го пријавило во МВР.Во меѓувреме, според неофицијални информации, до обвинителството била доставена и кривична пријава во која се изнесуваат сериозни наводи за шпионажа, прикривање докази и злоупотреба на службена положба, а се споменуваат и лица од високи државни институции.„Скопје1“ не може независно да ја потврди автентичноста на тие наводи, ниту точноста на содржината на пријавата, а за лицата што се споменуваат нема официјална потврда дека против нив се води постапка.

Македонија | пред 4 часа

Шпионски скандал кај претседателката Сиљановска: обвинителот пет месеци чека снимки од видеo-надзорот за да види дали вработени краделе податоци

Повеќе од пет месеци, далеку од очите на јавноста, Обвинителството за гонење организиран криминал и корупција води предистражна постапка за сомнежи за недозволени активности во Кабинетот на претседателката Гордана Сиљановска-Давкова во Вила Водно.Предметот е отворен по известување од МВР – Сектор за компјутерски криминал, а се однесува на настан од 24 ноември 2025 година и, како што Обвинителството вели за „Скопје1“, „постоење индиции за преземени недозволени активности од висок државен интерес“.Според информациите од ОЈО ГОКК, истрагата се однесува на сомнежи дека доверливи електронски податоци од Кабинетот на претседателката биле неовластено преснимувани, а неофицијално се шпекулира дека дел од информациите можеле да завршат кај странски разузнавачки структури.Во рамки на постапката, обвинителството побарало судска наредба за пребарување на компјутерски систем, екстракција на податоци од компјутери и лаптопи, како и обезбедување на снимките од безбедносните камери во Вила Водно.„Дополнително, до Кабинетот на Претседателката беше упатено барање за доставување копии од видео записите од безбедносните камери поврзани со пријавениот настан, за периодот во кој истиот се случил“, велат од ОЈО ГОКК за „Скопје1“Но, и покрај сериозноста на предметот, обвинителството наведува дека со месеци не може да дојде до снимките од видео надзорот.„На почетокот на 2026 година, по добиено известување дека Кабинетот на Претседателката не располага со копии од видео надзорот, бидејќи опремата е набавена преку СОЗР, а надлежноста за ракување и чување на записите е кај МВР, предметниот јавен обвинител се обрати и до СОЗР и до МВР за нивно итно обезбедување“, соопшти обвинителството за „Скопје1.Од СОЗР, според ОЈО ГОКК, било одговорено дека тие не располагаат со снимките, туку само ја набавиле опремата, додека чувањето на записите е во надлежност на МВР.„И покрај тоа, од страна на МВР до денес не се доставени повратни информации, ниту известување за преземени дејствија во врска со обезбедувањето на копиите од видео надзорот“, додаваат од обвинителството.Во март годинава, МВР доставило и два мобилни телефони одземени од пријавено лице кое работело во Вила Водно, по што обвинителството издало наредба за нивна екстракција и анализа.„На 16.03.2026 година, МВР достави известување за дел од преземените активности кои се однесуваат на обезбедување пристап до криптираните податоци од дотогаш екстрахираната компјутерска опрема“, наведуваат од ОЈО ГОКК.Дополнително, обвинителството побарало и анализа на податоците од телефоните, како и заедничка анализа на податоците екстрахирани од компјутерската опрема.Неофицијално, сомнежите се дека вработен во Кабинетот на претседателката пристапувал до електронски податоци, ги копирал, енкриптирал и складирал на надворешни носачи на податоци, а случајот наводно бил откриен од друго ИТ лице кое го пријавило во МВР.Во меѓувреме, според неофицијални информации, до обвинителството била доставена и кривична пријава во која се изнесуваат сериозни наводи за шпионажа, прикривање докази и злоупотреба на службена положба, а се споменуваат и лица од високи државни институции.„Скопје1“ не може независно да ја потврди автентичноста на тие наводи, ниту точноста на содржината на пријавата, а за лицата што се споменуваат нема официјална потврда дека против нив се води постапка.„Скопје1“ побара став и од Кабинетот на претседателката Гордана Сиљановска-Давкова. Доколку добиеме одговор, истиот ќе биде дополнително објавен.

Македонија | пред 5 часа

Претседателката со велигденска порака: боите на јајцата се симбол на животот и надежта

Претседателката Гордана Сиљановска-Давкова упати велигденска порака во која истакнува дека боите со кои се вапцаат велигденските јајца се симбол на животот што победува и на надежта што се обновува.Таа нагласи дека чинот на вапцање јајца не е само традиционален обичај, туку и момент на семејна блискост, заедништво и духовна подготовка за најголемиот христијански празник.Во пораката, Сиљановска-Давкова посочи дека со достоинство, смирение и љубов се очекува Христовото воскресение.

Македонија | пред 1 месец

Сиљановска-Давкова ги прими акредитивните писма на новите амбасадори на Русија и Перу

Претседателката Гордана Сиљановска-Давкова денеска ги прими акредитивните писма на новоименуваниот амбасадор на Русија, Дмитриј Константинович Зиков, како и на новоименуваната амбасадорка на Перу со седиште во Букурешт, Глорија дел Кармен Оливарес.При средбата со амбасадорот Зиков, претседателката изрази уверување дека неговите дипломатски активности ќе бидат насочени кон професионално застапување на интересите на Руската Федерација и на рускиот народ, во согласност со меѓународното право. Таа изрази и надеж дека претстојниот голем христијански празник Велигден ќе донесе крај на војните и почеток на нова ера на мир и благосостојба.Од своја страна, амбасадорот Зиков оцени дека претставувањето на неговата земја во Македонија е висока дипломатска мисија и изрази подготвеност за отворена соработка и развој на рамноправни и заемно корисни односи.На средбата со амбасадорката Оливарес, Сиљановска-Давкова посочи дека Северна Македонија и Перу веќе две децении градат пријателски односи засновани на меѓусебно разбирање и почит. Таа нагласи дека постојат значајни можности за унапредување на соработката, особено во областа на економијата, културата, туризмот, образованието и науката.Претседателката истакна дека во услови на глобализација, вештачка интелигенција и дигитализација, географската оддалеченост меѓу државите станува сè помалку значајна, а мултилатерализмот може да биде важен механизам за решавање на сложените глобални предизвици во рамките на Обединетите нации.Амбасадорката Оливарес нагласи дека, и покрај географската оддалеченост, двете земји споделуваат заеднички вредности како демократијата, човековите права и владеењето на правото. Таа изрази уверување дека за време на нејзиниот мандат ќе работи на понатамошно зајакнување на билатералните односи и развој на соработката меѓу двете држави.На крајот од средбата, претседателката ѝ посака успех на амбасадорката Оливарес во извршувањето на нејзината дипломатска мисија.

Македонија | пред 1 месец

Средба на Сиљановска-Давкова со Никол Варнс, вршителка на должноста амбасадорка во Амбасадата на САД

Претседателката Гордана Сиљановска-Давкова ја прими Никол Варнс, вршителка на должноста шеф на мисијата во Амбасадата на САД.Таа изрази подготвеност за понатамошна соработката со истата динамика и посветеност како со претходната амбасадорка.Разговорот започна со осврт на меѓународните односи, состојбите во НАТО, ЕУ и регионот.Потоа соговорничките се фокусираа на македонските работи: реформските процеси во судството, дигитализацијата, борбата против корупцијата и организираниот криминал и реализацијата на инфраструктурните проекти.За нив, инклузивниот модел на одлучување и меритократијата во сите сфери на општествениот живот, а особено во образовниот систем и во регрутирањето на државната и јавна администрација на највисоко ниво се клучни не само за нашата евроинтеграција, туку и за просперитетот на државата.Во време на безбедносни предизвици и ризици, за обете, американско-македонското стратешко партнерство, како и  сојузништвото во НАТО се важни за стабилноста.Амбасадорката ја потврди американската подготвеност за унапредување на пријателските односи, поздравувајќи ја неодамна усогласената заедничка изјава за рамката за идниот Договор за реципрочна, фер и балансирана трговија, како значаен чекор во зајакнувањето на економската соработка.Сиљановска-Давкова и Варнс очекуваат со Акцискиот план да се конкретизираат низа проекти во интерес на граѓаните.

Македонија | пред 3 месеци

Сиљановска-Давкова разговараше со раководството на Факултетот за музичка уметност

По повод големиот јубилеј 60 години постоење и дејност на Факултетот за музичка уметност, претседателката Гордана Сиљановска-Давкова ги прими деканката проф. м-р Дарија Андовска, продеканката за настава и наука, проф. д-р Соња Здравкова-Џепаровска и продеканката за концертна дејност, вонр. проф. м-р Марија Вршкова.За деканката Андовска успехот на факултетот е резултат на големото музичко знаење, љубов, креативност, труд и посветеност на повеќето генерации наставен кадар.Јубилејот добива на тежина и значење заради фактот дека за релативно кусо време, вработените постигнале далеку поголеми резултати од факултетите, односно музичките академии од регионот, стари и по стотина години.Честитајќи им го роденденот, претседателката ја потенцираше важноста на едукативната и педагошката работа на Факултетот, којшто изнедрил музички и уметнички великани како Симон Трпчевски.За Сиљановска-Давкова, неспорна и непроценлива е амбасадорската улога на нашите музички уметници во промоцијата на македонската држава ширум светот.Таа со задоволство ја прифати поканата да биде покровителка на јубилејот на институцијата којашто е расадник на уметници без кои не може да се замисли успешната работа на Филхармонијата, Националната опера и балет, Националниот џез оркестар, како и на бројните ансамбли и оркестри.Професорките ја запознаа претседателката со тешките предизвици од финансиска и просторна природа, хроничниот недостиг на инструменти и опасноста од згаснување на некои катедри во отсуство на кадар.Тие очекуваат преиспитување и измена на низа предложени решенија од новиот Закон за високо образование во претстојната дебата.

Македонија | пред 3 месеци