GTA

Хуман гест на Rockstar: Смртно болен фан доби шанса да ја игра GTA 6 пред премиерата

Додека милиони гејмери ширум светот со нетрпение ја очекуваат есента 2026 година и премиерата на најамбициозниот проект во гејминг-индустријата, Rockstar Games уште еднаш ја покажа својата хумана страна.Сè започна со јавен апел на Ентони Армстронг, девелопер во студиото Ubisoft Toronto, кој преку LinkedIn им се обрати на раководните луѓе на Rockstar Games. Негов близок роднина, кој со години се бори со рак, добил прогноза од само неколку месеци живот, што значи дека најверојатно нема да го дочека официјалното излегување на Grand Theft Auto VI.Армстронг во својата објава побара компанијата да му овозможи на неговиот роднина, верен фан на серијалот уште од првите изданија, барем краток увид во новата игра, со целосно почитување на сите договори за доверливост.Благодарение на големата поддршка од заедницата, апелот стигнал до вистинските луѓе. Според последните информации, со Армстронг лично стапил во контакт Штраус Зелник, извршен директор на Take-Two Interactive, компанијата под чие крило работи Rockstar Games.Набргу потоа, Армстронг потврди дека е постигнат договор.„Разговаравме со нив и добивме одлични вести. Тоа е сè што можам да кажам во овој момент, но благодарам на сите за поддршката“, напиша тој, по што ја повлече објавата со цел да ја заштити приватноста на семејството.Иако Rockstar Games строго ги чува сите детали поврзани со GTA VI, ова не е првпат компанијата да направи исклучок од хуманитарни причини. Сличен случај имаше и во 2018 година со играта Red Dead Redemption 2, кога на тешко болен фан од Холандија му беше овозможено да ја игра играта пред нејзиното официјално излегување.Официјалниот излез на GTA VI е планиран за ноември 2026 година за конзолите PlayStation 5 и Xbox Series X/S, додека верзијата за PC се очекува подоцна.

Магазин | пред 2 седмици

Нема фотографија

(ВИДЕО) Објавени видеа од новата „GTA 6“

На YouTube и на други социјални мрежи се споделуваат над 90 различни видеа од гејмплејот на новата „GTA 6“ игрица.Компанијата Take-Two потврди за The Verge дека протечените видео клипови од игрицата „GTA 6“ објавени на 18 септември се автентични и побара сите да бидат избришани од секаде.Воедно, против сите оние кои неовластено ги поставиле видеата на своите канали, преку кои се споделени ширум интернетот, ќе добијат тужба или на некој друг начин ќе сносат одредени последици, рекоа од компанијата.Протече над 3 гигабајти видео материјал, околу 90 клипови, кои се раширија низ YouTube и други социјални мрежи, а одговорните за ова протекување најавија дека наскоро ќе објават и „GTA 5“ и „GTA 6“ source кодови, test build-ови и многу додатен материјал. Ова протекување се поврзува со хакирањето на компанијата Uber од пред некоја недела, но за сега не е потврдена поврзаноста.Протекувањето уште сега, изгледа, содржи дел од изворниот код на игрицата, што би можело да биде голем проблем за Rockstar. Протекувањето на изворниот код претставува безбедносен ризик па во компанијата го сфаќаат многу сериозно. Тоа е една од причините зошто „Half-Life 2“ беше одложен уште во раните 2000-ти, а неодамнешното хакирање на CD Projekt Red создаде огромно доцнење на закрпите и експанзијата за „Cyberpunk 2077“ по лансирањето. Можно е ова протекување да предизвика доцнење и на „Grand Theft Auto VI“.Што се гледа на „GTA 6“ видео снимките?Видео клиповите кои се достапни на интернет го прикажуваат точно она што и се очекуваше. Се гледаат двата главни лика во игрицата, се гледаат делови од Vice City, една снимка покажува подобрено механичко пукање, а друга подобрен систем на грабежи.Голем дел од снимките имаат мени за отстранување на грешки во игрицата (јасно прикажани), а иако графиката изгледа подобрена во однос на „GTA V“, вреди да се напомене дека ова е пре-алфа верзија, така што сѐ уште не е испеглана до крај и дека тој дел допрва претстои. Многу аспекти на игрицата би можеле да се променат од овој момент па сѐ до лансирањето.YouTube, Twitter, Reddit и Discord се преплавени со клипови од „GTA 6“ кои ги потврдуваат информациите објавени претходно дека игрицата прв пат во историјата ќе има и женски лик со кој ќе може да се игра и кој ќе биде рамноправен со машките протагонисти.Видеото со Vice City Metro и други потврдуваат и дека претходно објавените гласини дека „GTA 6“ ќе се одвива во виртуелна реплика на градот Мајами, тоест во град кој многу потсетува на Мајами. Видео материјалот открива и дека игрицата е тестирана на PlayStation конзоли, но и на PC конфигурации со RTX 3060 Ti и RTX 3080 графики, тоест на „машини не постари од две години“.Моментално Take-Two и Rockstar се занимаваат со отстранување на видеата и гонење на оние кои ги споделија истите, па кај многумина такви сега се појавува пораката „This video is no longer available due to a copyright claim by Take 2 Interactive“. Таа задача ќе биде доста тешка, но се очекува сите видеа сепак да бидат тргнати.Игрицата „GTA 6“, ако им се верува на гласините од претходно, далеку е од излегување барем две години и би требало да се појави или на крајот од 2024 или во текот на 2025 година.

Магазин | пред 3 години