ФИФА направи важна измена што може да го промени текот на Светското првенство
ФИФА воведе значајна промена во дисциплинските правила за Светското првенство 2026, со која значително се намалуваат шансите фудбалерите да го пропуштат финалето поради суспензија предизвикана од акумулирани жолти картони.Новото правило предвидува жолтите картони да се бришат по завршувањето на групната фаза, што значи дека играчите ќе ја започнат нокаут-фазата со „чисто досие“. Дополнително, амнестија ќе има и по четвртфиналето, со што картоните повторно ќе се поништуваат пред завршните натпревари на турнирот.На тој начин, ФИФА практично воведува двојна амнестија за жолтите картони на проширениот Мундијал со 48 репрезентации, со цел најдобрите фудбалери да не останат без настап во најважните мечеви поради дисциплински казни.Црвените картони, сепак, и натаму носат автоматска суспензија од најмалку еден натпревар, а Дисциплинската комисија на ФИФА може да изрече и построги санкции во зависност од тежината на прекршокот.Дека ФИФА има пофлексибилен пристап кон дисциплинските мерки покажа и случајот со Кристијано Роналдо. Иако, според правилникот, му се закануваше подолга суспензија по инцидентот во квалификациите против Ирска, Дисциплинската комисија му изрече казна од само еден натпревар, овозможувајќи му да биде подготвен за настап на Светското првенство.Измените доаѓаат во пресрет на историското Светско првенство во САД, Канада и Мексико, кое за првпат ќе се игра со 48 национални селекции.
Спорт | пред 11 час