(Видео) Скопјанка алармира: Чопор од над 20 кучиња напаѓа велосипедисти на кејот, да паднев немаше да ме остават
Скопјанката Ирина Нелковска преку јавен апел предупреди на сериозен безбедносен проблем на кејот на Вардар, откако утринава била опколена од голем чопор кучиња додека со велосипед се движела кон работа.Според нејзиното сведоштво, инцидентот се случил околу 7 часот наутро на потегот од адреналинскиот парк во Карпош 4 до „Александар Палас“, каде, како што вели, веќе подолго време има групи кучиња кои реагираат на велосипеди, тротинети и тркачи.„На клипот се гледаат четири-пет кучиња како ми се пуштија. Останав смирена, очекував дека ќе се откажат и ќе ја поминам трасата. Не ме исплашија, тоа за мене беше очекувано“, наведува Нелковска.Ситуацијата, како што раскажува, станала опасна кога кон првичната група почнале да се приклучуваат нови кучиња.„Од пешачката патека почнаа да се приклучуваат нови и нови. Можеби беа околу 20 ако не и повеќе. Почнаа агресивно да се пуштаат, веќе не беше безбедно“, вели таа.Нелковска додава дека во обид да избегне напад, забрзала со велосипедот, но кучињата продолжиле да ја следат и да ѝ ги влечат торбите.„На два-три пати осетив како ги влечат дисаѓите во обид да изгубам рамнотежа. Ако паднев, оној чопор немаше да ме остави на мира. Немаше никој околу мене да помогне“, предупредува таа.Таа оценува дека ваква ситуација е недозволива за урбана средина и апелира до надлежните институции итно да преземат мерки.„Премногу се и опасни се за било кого. Прашање на време е кога некој ќе настрада. Крајно време е некој да преземе сериозни мерки“, порачува Нелковска.Граѓаните со месеци реагираат за зголемен број бездомни кучиња на кејот, но, според нив, конкретно решение од институциите сѐ уште нема.
Скопје | пред 15 часа
