ЛАБУДОВИЌ

Лабудовиќ од КОСАП: Балканот мора да стане енергетски коридор на Европа, а не периферија на транзицијата

Енергетската сигурност, забрзаната зелена транзиција и регионалното поврзување беа во фокусот на обраќањето на заменик-министерот за енергетика, рударство и минерални суровини Мирослав Лабудовиќ на XXIII Конференција на парламентарните комисии за европска интеграција и европски прашања (КОСАП), што се одржа во Струга.Обраќајќи се пред претставници на институции и парламентарни тела од земјите од Југоисточна Европа, Лабудовиќ истакна дека енергетската сигурност повеќе не може да се третира како национално прашање, туку како заедничка регионална и европска одговорност која бара координиран пристап, инвестиции и силна меѓусебна соработка.Во своето излагање тој се осврна на новиот Закон за енергетика, кој е усогласен со европското законодавство, нагласувајќи дека реформите мора да обезбедат реални придобивки за економијата и стопанството.„Зелената транзиција е неопходна, но таа мора да биде праведна и економски одржлива. Механизмите како CBAM не смеат да ја намалат конкурентноста на компаниите од регионот, туку треба да создадат услови за нивен развој и модернизација“, порача Лабудовиќ.Говорејќи за енергетската трансформација, заменик-министерот нагласи дека Македонија интензивно работи на забрзување на инвестициите во обновливи извори на енергија, но и на развој на системи кои ќе обезбедат стабилност и сигурност на мрежата.Тој посочи дека покрај изградбата на нови соларни и ветерни капацитети, фокусот е ставен на батериските системи за складирање на енергија и на проекти што ќе овозможат поефикасно искористување на хидропотенцијалот, како клучни предуслови за успешно балансирање на енергетскиот систем.Посебен акцент беше ставен и на модернизацијата на електроенергетската инфраструктура преку развој на паметни мрежи (Smart Grids), кои ќе овозможат поголема ефикасност, подобро управување со ресурсите и активно учество на граѓаните и компаниите во производството на електрична енергија.„Не можеме да градиме енергетски системи на иднината врз инфраструктура од минатиот век. Дигитализацијата и паметните мрежи создаваат услови секој граѓанин и секоја компанија да станат активни учесници на пазарот и дел од енергетската транзиција“, истакна Лабудовиќ.Во рамките на конференцијата беше нагласена и важноста од изградба на нови енергетски интерконекции со соседните земји, со што Западен Балкан ќе се позиционира како значаен регионален коридор за пренос на чиста енергија и зајакнување на енергетската безбедност.Лабудовиќ потенцираше дека паралелно со процесот на дигитализација, заштитата на критичната енергетска инфраструктура и кибер-безбедноста на мрежите претставуваат врвен стратешки приоритет.Учеството на Министерството за енергетика, рударство и минерални суровини на КОСАП конференцијата претставува потврда за активната улога на Македонија во регионалните и европските процеси, насочени кон создавање на модерен, отпорен и одржлив енергетски систем во корист на граѓаните и стопанството.

Македонија | пред 1 седмица

Николова до Лабудовиќ: Кој ќе понесе одговорност за затруените работници во РЕК Битола?

На денешната седница за пратенички прашања, пратеничката од СДСМ, Даниела Николова, во отсуство на министерката за енергетика, рударство и минерални суровини, Сања Божиновска, упати прашање до заменик-министерот Мирослав Лабудовиќ во врска со случајот на масовно труење на работници во РЕК Битола. Николова побара детално да се испита причината за инцидентот и да се утврди одговорноста за настанатата состојба.Во своето излагање, Николова посочи дека, според јавни информации, поголем број работници се жртви на труење што се случило во кујната на РЕК Битола. Надлежните инспекциски служби на Агенцијата за храна и ветеринарство, како и други институции, излегле на терен, наредено било вонредно чистење на кујната и спроведени се вонредни санитарни прегледи на вработените.Таа нагласи дека бројките на заболени работници постојано се менуваат – првично се зборувало за пет до шест случаи, потоа бројот се искачил на околу 80, а сега се споменува и троцифрена бројка. Николова го праша заменик-министерот кој е одговорен за инцидентот и дали ќе бидат преземени сите законски мерки за казнување на оние што ја довеле ситуацијата до ваков сериозен степен.Овој случај ја отвори дебатата за безбедноста и здравствените стандарди на работниците во РЕК Битола, како и за контролата на работните процеси во енергетскиот сектор.

Македонија | пред 2 месеци

Лабудовиќ во Центар со поддршка од ВЛЕН

Во вториот круг од локалните избори, кандидатот за градоначалник на Центар од редовите на ЗНАМ Мирослав Лабудовиќ ќе ja добие поддршката од ВЛЕН.Вечерва, Лабудовиќ, заедно со генералниот секретар на ЗНАМ, Горан Минчев, ја официјализираа соработката на средба со локалните жители од Кале и Дуќанџик. На средбата присуствуваа новоизбраниот градоначалник на Чаир, Изет Меџити кој ги повика жителите од албанска националност од овие населени места на 2 ноември кога ќе се гласа во вториот круг, да му се даде максимална поддршка на кандидатот за градоначалник од Движењето ЗНАМ, Мирослав Лабудовиќ.Затоа што само на тој начин, може да се надеваат на брзо, ефикасно и целосно решавање на нивните комунални проблеми, кои во претходните неколку години во мандатот на Горан Герасимовски воопшто не беа надминати, смета ВЛЕН.И Максим Димитриевски ќе биде поддржан од ВЛЕН во Куманово.

Македонија | пред 7 месеци

ЗНАМ со листи во над 50 општини, Димитриевски и Лабудовиќ кандидати за градоначалници

„Движењето ЗНАМ започнува ново и силно поглавје во своето политичко делување. Преку нашите претставници во локалната самоуправа ќе покажеме како вистински се управува со општините – чесно, одговорно и со визија“, изјави Мемов.Одлуките што беа донесени се: ЗНАМ ќе настапи самостојно со листи за советници во повеќе од 50 општини; ќе има взаемна соработка со ВМРО-ДПМНЕ околу поддршка на кандидатите за градоначалници, при што ЗНАМ ќе ги поддржи кандидатите на ВМРО-ДПМНЕ во сите општини, вклучително и во Скопје, додека ВМРО-ДПМНЕ ќе ги поддржи кандидатите на ЗНАМ во определени општини; за Куманово кандидат е актуелниот градоначалник и претседател на движењето Максим Димитриевски, а за Центар – Мирослав Лабудовиќ, заменик-министер за енергетика и претседател на градската организација на ЗНАМ во Скопје.Мемов нагласи дека нивните кандидати се личности со „чист образ, интегритет и визија“, а преку советниците и градоначалниците ќе се погрижат секоја општина да стане подобро место за живеење, со вложувања во инфраструктура, образование, социјална заштита, култура и спорт.На новинарско прашање зошто имаат само два кандидати за градоначалници, Мемов рече дека ЗНАМ настапува „релаксирано, без притисок да има кандидати по секоја цена“. Тој не ја исклучи можноста во наредниот период да бидат објавени и други кандидатури за градоначалници, но потврди дека сериозен акцент ќе биде ставен на советничките листи во над 50 општини.

Македонија | пред 9 месеци