МОК

Фокус на 3x3 кошарка и младински спорт: нова регионална соработка меѓу МОК и ОКС

Претседателот на Македонскиот олимписки комитет (МОК), Даниел Димевски, оствари работна средба со претседателот на Олимпискиот комитет на Србија, Дејан Томашевиќ, посветена на унапредувањето на меѓусебната соработка и иднината на олимпискиот спорт во регионот.Средбата се одржа во просториите на Комитетот во пријателска атмосфера и конструктивен дијалог, при што беа дефинирани повеќе стратешки приоритети за натамошно дејствување.Централна тема на разговорите беше заедничкиот настап преку европската програма „Еразмус+“. Договорено е здружување на капацитетите на двата комитета за заедничко аплицирање и реализација на проекти, со цел максимизирање на ресурсите наменети за развој на спортот, едукацијата и младинските спортски иницијативи.Истовремено, посебен акцент бил ставен на креирање стратегии и размена на најдобри практики за дополнителна популаризација и развој на 3х3 кошарката.Во насока на идни соработки, соговорниците најавија дефинирање на конкретни чекори што вклучуваат размена на стручен кадар и континуирана организација на заеднички подготовки на спортистите од двете земји.Во рамки на посетата, претседателот Димевски ги презентираше на својот српски колега Томашевиќ инфраструктурните капацитети на Олимпискиот спортски центар. Гостинската делегација имаше можност директно да се запознае со условите за тренинг, развој и стручно усовршување, при што посебно била истакната најсовремената лабораторија за мерење на спортски перформанси.Двајцата претседатели заклучиле дека постои огромен потенцијал за заедничко дејствување кое во иднина значително ќе придонесе за развојот на олимпиското движење во двете држави.

Спорт | пред 2 седмици

МОК: Нема врвен резултат доколку спортот не е безбеден за сите негови учесници

Во рамки на конференцијата „Препознавање на родово базирано насилство и механизмите за заштита на жените во спортот“, Македонскиот Олимписки Комитет беше претставен од Елена Зисовска Апостолска, која во своето обраќање истакна дека безбедноста, достоинството и заштитата на сите спортисти се темелни вредности на Интернационалниот олимписки комитет и Олимписката повелба.Таа нагласи дека нема врвен и олимписки резултат доколку спортот не е безбеден за сите негови чинители, и дека Македонскиот Олимписки Комитет ја има препознаено оваа тема како приоритет, со назначен офицер за заштита во спортот и тековен проект што ги опфаќа националните спортски федерации, со цел воспоставување конкретни механизми и политики за заштита.Настанот отвори значајна дискусија за предизвиците и решенијата за поголема безбедност, еднаквост и заштита на жените во спортот.

Спорт | пред 3 седмици

МОК почестен со посебно признание за придонес кон училишниот спорт

На свечената церемонија на затворањето на Светското училишно првенство во ракомет, одржана во Спортскиот центар „Јане Сандански“ во Скопје, Македонскиот олимписки комитет (МОК) доби посебно високо признание. Федерацијата на училишен спорт на Македонија му додели почесна Благодарница на МОК за особен придонес и поддршка во успешната реализација на овој врвен меѓународен спортски настан.Во име на Македонскиот олимписки комитет, благодарницата официјално ја прими Раководителот на сектор спорт, Петар Спасеновски. Признанието му беше врачено лично од претседателката на Федерацијата на училишен спорт, Елена Мицковска.Со доделувањето на ова признание, Федерацијата јасно ја изразува својата благодарност за континуираната поддршка од страна на највисокото спортско тело во земјата. Овој гест ја потврдува силната и трајна партнерска врска помеѓу МОК и Федерацијата на училишен спорт. МОК уште еднаш даде до знаење дека не е само официјален партнер, туку е секогаш присутен и спремен да помогне во секој аспект на развојот и поддршката на училишниот спорт, бидејќи токму од овие сали произлегуваат идните олимписки надежи на Македонија.

Спорт | пред 3 седмици

МОК во работна посета на Струмица- Интензивна поддршка за развој и унапредување на локалниот спортски екосистем

Делегација на Македонскиот олимписки комитет (МОК), предводена од претседателот Даниел Димевски, оствари работна посета на Општина Струмица со цел мапирање на состојбите во струмичкиот спорт и воспоставување системска соработка. Во делегацијата беа и генералниот секретар Ѓорѓи Тасев, како и раководителите Петар Спасеновски (Сектор спорт) и Сашо Поповски (Меѓународна соработка).Централен настан беше работната сесија со локалната спортска фела – тренери, поранешни спортисти, професори по физичко образование и претставници на клубовите. Во исклучително конструктивна атмосфера, отворено се дебатираше за реалните проблеми, при што не изостанаа ниту издржаните критики. Присутните го поздравија проактивниот теренски пристап на МОК како клучен чекор за креирање успешни спортски политики.Делегацијата оствари средба и со градоначалникот Петар Јанков, кој, придружуван од советникот за спорт Ристо Ристов, ги презентираше актуелните предизвици и амбициозните инфраструктурни проекти кои општината ги планира за наредниот период.Претседателот на МОК, Даниел Димевски, јасно порача дека поддршката за Струмица нема да биде само декларативна. Беше најавено интензивно вклучување на МОК преку стручна и едукативна помош за спортските кадри, имплементација на програми за идентификација на таленти и јакнење на капацитетите на клубовите.Оваа средба е силен импулс за создавање одржлив и модерен систем кој ќе генерира нови спортски надежи и ќе го врати сјајот на струмичкиот спорт.

Спорт | пред 1 месец