Слободна Европа на македонски се одјавува по 25 години
Радио Слободна Европа го затвора сервисот на македонски јазик, со што на 31 март 2026 година завршува неговото долгогодишно присуство во медиумскиот простор во земјава.Одлуката ја соопштија од медиумот, посочувајќи дека станува збор за дел од реорганизација поради буџетски ограничувања. Претседателот и извршен директор на РСЕ, Стивен Капус, оцени дека затворањето претставува загуба за публиката, но е неопходен чекор за пренасочување на ресурсите.Македонскиот сервис започна со работа на 1 септември 2001 година, со мисија да обезбедува проверени и балансирани информации и да придонесува за промоција на демократските вредности и човековите права.Во текот на своето постоење, редакцијата беше дел од пошироката мрежа на РСЕ, медиум историски познат по известување зад Железната завеса, а во поново време фокусиран на дигитални платформи и борба против цензурата.Тимот на РСЕ им се заблагодари на читателите, слушателите и соработниците за довербата и поддршката, истакнувајќи дека вредностите на слободното и одговорно новинарство ќе останат нивно трајно наследство.
Македонија | пред 6 дена
