Зоонеговател од скопската Зоолошка алармира: Ученици фрлале камења кон слоница, професорите седеле на кафе
Зоонегователот Виктор, кој работи во скопската Зоолошка градина, сподели непријатно искуство што, како што вели, го посведочил денеска, при што ученици од средното училиште „Лазар Танев“ фрлале камења кон слоницата, додека нивните професори седеле во кафе-објект.Во својата објава на социјалните мрежи, тој наведува дека ваквото однесување го разочарало и претставува сериозен проблем за односот кон животните кои се под грижа на Зоолошката градина.„Група ученици од средното угостителско ‘Лазар Танев’ фрлаа камења кон слоницата, додека нивните професори седеа на кафе во кафич. Не сакам да генерализирам — не се сите деца исти, ниту сите професори се неодговорни. Но, вакви поединци оставаат лоша слика и, уште полошо, нанесуваат стрес и штета на животни кои се под наша грижа“, напиша тој, додавајќи дека животните се чувствителни и интелигентни суштества.Тој направи и споредба со порано време, наведувајќи дека пред 25 до 30 години ваквото однесување би имало сериозни последици и од дома и од училиштето, бидејќи постоеле, како што вели, поголем ред, почит и одговорност.„Научете ги децата дека животните не се мета за забава, туку живи суштества што заслужуваат почит“, порача тој, додавајќи дека бил информиран оти директорот реагирал на настанот и изрази надеж дека ќе следуваат соодветни мерки.
Скопје | пред 4 часа
