ШПИОНАЖА

(Фото) Додека јавноста чека одговори за шпионската афера, Сиљановска-Давкова објави дека уживала на опера со „Мадам Батерфлај“

Претседателката Гордана Сиљановска-Давкова беше на претставата „Мадам Батерфлај“ во Македонската опера и балет, додека јавноста и натаму чека официјален став од нејзиниот Кабинет за скандалот со сомнежи за шпионажа и недозволени активности во Вила Водно, за кој веќе пет месеци се води предмет во Обвинителството за гонење организиран криминал и корупција.Од Кабинетот на претседателката втор ден нема никаков одговор на прашањата поврзани со истрагата, сомнежите за неовластено копирање доверливи податоци и навонодно „исчезнатите“ снимки од безбедносните камери.Но, во исто време, на официјалниот фејсбук-профил на претседателката беше објавен статус за посетата на операта и впечатоците од претставата.„Уживавме во делото на Пучини, како врвен уметнички дострел. Она што му даде посебна вредност и убавина беше хармонијата меѓу изведувачите од различни држави, како доказ за уникатната улога на културната дипломатија“, објави Сиљановска-Давкова.Таа посебно ги спомена диригентот Мирон Михаилидис од Грција и режисерот Александар Текелиев од Бугарија, оценувајќи дека уметноста покажува како „Балканот најубаво се разбира кога создава заедно“.Во меѓувреме, Обвинителството за гонење организиран криминал и корупција јавно соопшти дека со месеци не може да дојде до снимките од безбедносните камери од Вила Водно, иако тие биле побарани во рамки на предметот за сомнежи за недозволени активности од висок државен интерес.Според ОЈО ГОКК, предметот бил отворен уште во декември 2025 година по известување од МВР – Сектор за компјутерски криминал, а се однесува на сомнежи дека доверливи електронски податоци од Кабинетот на претседателката биле неовластено преснимувани.„И покрај тоа, од страна на МВР до денес не се доставени повратни информации, ниту известување за преземени дејствија во врска со обезбедувањето на копиите од видео надзорот“, соопштија претходно од ОЈО ГОКК за „Скопје1“.Министерството за внатрешни работи, пак, не даде директен одговор каде се снимките, туку соопшти дека е „во тек анализа на сите електронски докази кои се екстрахирани од одземената опрема“.Во меѓувреме, премиерот Христијан Мицкоски случајот го нарече „шпионски талог на општеството“ и зборуваше за „структури од минатото“, додека Кабинетот на претседателката сѐ уште нема официјален коментар за аферата.

Македонија | пред 2 седмици

Мицкоски за аферата со шпионажа кај претседателката Сиљановска: „Тоа се шпионски талог и глодари од минатото“

Премиерот Христијан Мицкоски со остри зборови ја коментираше аферата поврзана со сомнежите за шпионажа во Кабинетот на претседателката Гордана Сиљановска-Давкова во Вила Водно, оценувајќи дека станува збор за „шпионски талог на општеството“ и „структури од минатото“.Одговарајќи на новинарско прашање дали има сознанија за случајот и дали може да сподели детали, Мицкоски рече:„Па, видете, тоа се шпионски талог на општеството, структури од минатото. Коишто се наоѓале во кабинетите како глодари на некои поранешни политичари. Претседатели, премиери и така натаму.“Премиерот тврдеше дека тие лица се претставувале како група вработени и испраќале анонимни дописи до обвинителствата.„И тие се претставуваат како група вработени и испраќаат анонимни дописи до обвинителства“, рече Мицкоски.Во изјавата тој директно го спомена и шефот на Обвинителството за гонење организиран криминал и корупција, Ислам Абази.„Се разбира, таму е Ислам Абази, веднаш да истрча и да создаде паника во јавноста дека нешто се случувало“, изјави премиерот.На крајот додаде дека не сака повеќе да ги коментира лицата кои ги нарече „глодари“.„Јас не би ги коментирал овие глодари, бидејќи мислам дека треба да ги заборавиме“, рече Мицкоски.Претходно, „Скопје1“ објави дека Министерството за внатрешни работи не даде конкретен одговор каде се снимките од безбедносните камери од Вила Водно, кои Обвинителството за гонење организиран криминал и корупција ги бара со месеци во предметот за сомнежи за шпионажа и недозволени активности во Кабинетот на претседателката.Според ОЈО ГОКК, предметот бил отворен уште во декември 2025 година по известување од МВР – Сектор за компјутерски криминал, а се однесува на сомнежи дека доверливи електронски податоци од Кабинетот на претседателката биле неовластено копирани и можеби завршиле кај странски разузнавачки структури.Обвинителството соопшти дека со месеци бара копии од видео надзорот од Вила Водно, но дека до денес нема добиено повратни информации од МВР за обезбедувањето на снимките.

Македонија | пред 3 седмици

Наместо одговор каде се снимките кои се бараат пет месеци, МВР наброја што досега презело за шпионажата кај претседателката Сиљановска

Министерството за внатрешни работи не даде конкретен одговор каде се снимките од безбедносните камери од Вила Водно, кои Обвинителството за гонење организиран криминал и корупција ги бара со месеци во предметот за сомнежи за шпионажа и недозволени активности во Кабинетот на претседателката Гордана Сиљановска-Давкова.„Скопје1“ побара од МВР одговор дали снимките воопшто се обезбедени, зошто пет месеци не се доставени до обвинителството и зошто ОЈО ГОКК тврди дека нема добиено ниту повратна информација за преземените дејствија. Наместо директен одговор, од МВР само набројаа дел од активностите што ги преземаат во предметот.„Ве известуваме дека од страна на Секторот за компјутерски криминал при МВР се преземаат соодветни мерки и активности, односно одземени се компјутерска опрема и мобилни телефони. Во тек е анализа на сите електронски докази кои се екстрахирани од одземената опрема. Извршен е службен разговор со лица вработени во Кабинетот на Претседателот и за истите доставено е известување до ОЈО ГОКК. По целосно расчистување на случајот јавноста ќе биде соодветно известена“, велат од МВР за „Скопје1“.Претходно, „Скопје1“ објави дека повеќе од пет месеци, далеку од очите на јавноста, ОЈО ГОКК води предистражна постапка за сомнежи за недозволени активности во Кабинетот на претседателката во Вила Водно.Предметот бил отворен по известување од МВР – Сектор за компјутерски криминал, а според обвинителството, се однесува на „постоење индиции за преземени недозволени активности од висок државен интерес“.Според информациите од ОЈО ГОКК, постојат сомнежи дека доверливи електронски податоци од Кабинетот на претседателката биле неовластено преснимувани, а неофицијално се шпекулира дека дел од информациите можеле да завршат кај странски разузнавачки структури.Во рамки на постапката, обвинителството побарало судска наредба за пребарување на компјутерски систем, екстракција на податоци од компјутери и лаптопи, како и обезбедување на снимките од безбедносните камери во Вила Водно.„Дополнително, до Кабинетот на Претседателката беше упатено барање за доставување копии од видео записите од безбедносните камери поврзани со пријавениот настан, за периодот во кој истиот се случил“, соопштија од ОЈО ГОКК за „Скопје1“.Но, обвинителството наведува дека и по повеќе месеци не може да дојде до снимките.„На почетокот на 2026 година, по добиено известување дека Кабинетот на Претседателката не располага со копии од видео надзорот, бидејќи опремата е набавена преку СОЗР, а надлежноста за ракување и чување на записите е кај МВР, предметниот јавен обвинител се обрати и до СОЗР и до МВР за нивно итно обезбедување“, велат од обвинителството.Од СОЗР, според ОЈО ГОКК, било одговорено дека тие не располагаат со снимките, туку само ја набавиле опремата, додека чувањето и располагањето со записите било во надлежност на МВР.„И покрај тоа, од страна на МВР до денес не се доставени повратни информации, ниту известување за преземени дејствија во врска со обезбедувањето на копиите од видео надзорот“, додаваат од ОЈО ГОКК.Во март годинава, МВР доставило и два мобилни телефони одземени од пријавено лице кое работело во Вила Водно, по што обвинителството издало наредба за нивна екстракција и анализа.Неофицијално, сомнежите се дека вработен во Кабинетот на претседателката пристапувал до електронски податоци, ги копирал, енкриптирал и складирал на надворешни носачи на податоци, а случајот наводно бил откриен од друго ИТ лице кое го пријавило во МВР.Во меѓувреме, според неофицијални информации, до обвинителството била доставена и кривична пријава во која се изнесуваат сериозни наводи за шпионажа, прикривање докази и злоупотреба на службена положба, а се споменуваат и лица од високи државни институции.„Скопје1“ не може независно да ја потврди автентичноста на тие наводи, ниту точноста на содржината на пријавата, а за лицата што се споменуваат нема официјална потврда дека против нив се води постапка.

Македонија | пред 3 седмици