Српски државјанин осомничен за тешка сообраќајна несреќа со смртни последици кај Валандово
Основното јавно обвинителство Гевгелија поведе постапка против државјанин на Република Србија осомничен за тешки дела против безбедноста на луѓето и имотот во сообраќајот, по член 300 став 4 во врска со член 297 од Кривичниот законик.Инцидентот се случил на 19 ноември, рано утрото, кога осомничениот управувал товарно возило „Мерцедес“, натоварено со околу 24,5 тони пресувана хартија, на регионалниот пат од Валандово кон Дојран. Според обвинителството, возачот не се придржувал кон прописите за безбедност на патиштата, не го држел возилото блиску до десниот раб и не ја приспособил брзината кон условите на патот, со што го загрозил јавниот сообраќај.Возилото излетало од коловозот, се превртело на десната страна и при тоа било откриено дека во полуприколката превезувал 10 кинески државјани. Од нив, 35-годишна жена и уште еден маж го загубиле животот. Две лица се здобиле со тешки телесни повреди, а уште две со полесни.Поради опасност од бегство, имајќи предвид дека осомничениот е странски државјанин и тежината на последиците, јавниот обвинител доставил предлог до судијата на претходна постапка за определување притвор.Во исто време, надлежните органи преземаат дејствија за утврдување дали во случајот постојат елементи на кривично дело криумчарење мигранти.
Македонија | пред 1 месец