Пациентите со трансплантирани органи повторно ќе можат да го добиваат лекот Myfortic во јачини од 180 и 360 милиграми без доплата, откако Фондот за здравствено осигурување подготви предлог за усогласување на референтните цени.
Со предложеното решение, осигурениците нема да ја плаќаат досегашната доплата од 615 денари за Myfortic 180 mg, односно 1.439 денари за Myfortic 360 mg, а истовремено ќе се задржат придобивките од претходното намалување на цената на терапијата.
Фондот претходно во Шифрарникот на лекови вклучи дополнителни лекови со генеричкото име mycophenolic acid, со што се создаде конкуренција на пазарот и се намали цената на Myfortic. Цената на дозата од 180 mg била намалена за 291 денар, а на дозата од 360 mg за 2.012 денари.
Во меѓувреме, Фондот добил известување дека двата алтернативни лека од производителот STADA, кои биле вклучени како лекови без доплата, во моментов не се достапни на домашниот пазар поради производно-технички причини. Поради тоа, пациентите повторно би биле изложени на доплата за достапната терапија.
Фондот, по иницијатива на директорот Златко Перински и во координација со Министерството за здравство, извршил финансиски анализи и подготвил решение со кое Myfortic во двете јачини повторно ќе биде достапен без доплата.
Материјалот треба да биде разгледан на првата наредна седница на Управниот одбор на Фондот. По донесувањето на одлуката, Шифрарникот на лекови ќе биде објавен на веб-страницата на Фондот.
Од Фондот посочуваат дека и покрај усогласувањето на референтните цени, нивниот трошок за оваа терапија ќе остане понизок во однос на периодот пред намалувањето на цената. Само за втората половина од 2026 година се проектира заштеда од околу еден милион денари.
Целта, како што наведуваат од Фондот, е пациентите да ја добиваат потребната терапија без дополнителен финансиски товар, а истовремено средствата од здравствениот буџет да се користат порационално.
