Пад на цената на нафтата на светските берзи, денес нова одлука за горивата во Македонија

Цените на нафтата на светските берзи бележат пад поради надежите за смирување на конфликтот меѓу САД и Иран. Во Македонија, денес, 26 октомври, Регулаторната комисија за енергетика (РКЕ) треба да донесе нова одлука за максималните цени на горивата.

— реклама —

Според „Ројтерс“, во 5:26 часот по македонско време, нафтата „брент“ поевтинила за 1,89 отсто, на 114,51 долари за барел, додека американската нафта WTI забележала пад од 2,16 отсто, на 101,04 долари за барел.

Според последната одлука на РКЕ од 19 октомври, максималната цена на Еуросупер БС-95 изнесува 96 денари за литар, на Еуросупер БС-98 е 98 денари, а на Еуродизел 99 денари. Екстра лесното масло за домаќинство се продава по максимална цена од 110,50 денари за литар.

— реклама —

Новите цени ќе зависат од просечните берзански цени на нафтените деривати во изминатите седум дена, движењето на курсот на доларот, како и од другите трошоци и давачки. Поради тоа, падот на цената на суровата нафта не значи дека бензинот и дизелот автоматски ќе поевтинат.

— реклама —

Во меѓувреме, дипломатските напори за смирување на конфликтот продолжуваат. „Ројтерс“ објави дека катарски посредници отпатувале во Техеран во координација со Вашингтон.

Основачката на „Ванда инсајтс“, Вандана Хари, оцени дека ценовните осцилации ќе останат изразени, а ризиците и натаму ќе бидат насочени кон раст. Аналитичарката Пинки Јадав од „Чојс брокинг“ предупреди дека нова ескалација би можела да го наруши снабдувањето и повторно да предизвика големи промени на цените.

Извршниот директор на Меѓународната агенција за енергија, Фатих Бирол, предупреди дека енергетските пазари можеби нема да се вратат во состојбата пред војната ниту во 2027 година. Како причини ги посочи високите цени на нафтените деривати и растечката побарувачка за дизел во текот на зимата.