Пакистан испрати дополнителна воена помош во Саудиска Арабија по ескалацијата на конфликтот во Јемен, објави Германската новинска агенција (ДПА), повикувајќи се на неименувани извори од Исламабад.
Според изворите, новата помош вклучува артилериски системи, беспилотни летала и системи за одбрана од беспилотни летала. Пакистански воени единици, меѓу кои и системи за воздушна одбрана, борбени авиони и копнени сили, веќе се распоредени во Саудиска Арабија како дел од долгогодишното воено партнерство меѓу двете земји.
Саудиска Арабија во август потпиша трилатерален договор со Пакистан и Турција, со кој е предвидено вооружен напад врз една од трите држави да се смета за напад врз сите три сојузници.
Пакистански разузнавачки извори предупредуваат дека Пакистан и Турција би можеле да станат „активни“ во конфликтот доколку Хутите ја блокираат теснината Баб ал-Мандаб, која има стратешко значење за поморскиот сообраќај.
„Нашата морнарица ќе дејствува ако Хутите се обидат да ја задушат теснината Баб ал-Мандаб. Ќе дојдат и Турците“, изјавил пакистански разузнавач за ДПА.
Портпаролот на пакистанската армија, генерал-мајор Ахмед Шариф, денеска изјави дека Пакистан ќе направи сè што е потребно за да ја одбрани Саудиска Арабија, но не соопшти дополнителни детали.
Хутите, кои се поддржани од Иран, минатата недела во брза офанзива го зазедоа западниот брег на Јемен, со што добија пристап до стратешки важната теснина Баб ал-Мандаб, на влезот во Црвеното Море. Во меѓувреме, Саудиска Арабија повторно беше цел на напад од Хутите.
