Пакистан посредува меѓу Иран и САД: Министерот за внатрешни работи пристигна во Техеран

Пакистанскиот министер за внатрешни работи, Мохсин Накви, пристигна во Иран, каде што ќе разговара со иранското раководство за продолжување на преговорите со Соединетите Американски Држави во Швајцарија.

Според иранската новинска агенција „Мехр“, Накви најпрво допатувал во светиот град Машхад на североистокот од земјата, а во рамките на посетата се очекува да се сретне со претставници на иранскиот преговарачки тим, претседателот на парламентот, Мохамад Багер Галибаф, и министерот за надворешни работи, Абас Аракчи.

— реклама —

Пакистан од април официјално ја има улогата на посредник во разговорите меѓу Иран и САД, кои се обидуваат да постигнат поширок договор за стабилизација на регионот.

Вашингтон и Техеран претходно оваа недела потпишаа рамковен договор, со кој се предвидува прекин на непријателствата и обновување на трговскиот сообраќај низ Ормускиот Теснец. Во документот е утврден рок од 60 дена за решавање на спорните прашања, меѓу кои е и иранската нуклеарна програма.

— реклама —

Првата рунда разговори во Швајцарија првично беше закажана за петок, но беше одложена поради обновените судири меѓу Израел и Хезболах во Либан. По воспоставувањето примирје, дипломатските активности повторно се интензивираа.

— реклама —

Иранските власти и натаму инсистираат дека нема да има конечен договор без укинување на банкарските санкции, што би му овозможило на Техеран повторно да пристапи до меѓународниот финансиски систем и легално да ја извезува својата нафта.

Едно од клучните прашања останува и финансирањето на обновата. Рамковниот договор предвидува фонд од најмалку 300 милијарди долари за реконструкција, но сè уште не е решено кој и на кој начин ќе ги обезбеди тие средства.

— реклама —

Во меѓувреме, американскиот специјален пратеник, Стив Виткоф, и иранскиот министер за надворешни работи, Абас Аракчи, се очекува да пристигнат во Швајцарија за новата рунда разговори. Според американските медиуми, таму веќе се наоѓа и Џаред Кушнер, зет на американскиот претседател Доналд Трамп.

Дипломатските извори оценуваат дека примирјето во Либан отвора можност привремениот договор меѓу САД и Иран да прерасне во поширок и подолгорочен регионален договор.