Паркот во Карпош 4, покрај кејот на Вардар, треба да добие целосно нов изглед до крајот на годинава, најави скопскиот градоначалник Орце Ѓорѓиевски. Просторот, кој бил започнат во мандатот на поранешната градоначалничка Данела Арсовска, според него бил оставен недовршен и со низа проблеми.
Ѓорѓиевски вели дека Град Скопје го затекнал просторот со депонија, исушени дрвја и без хидрантска мрежа за наводнување на тревните површини. Во моментов се работи на уредување на паркот и поставување целосен систем за наводнување.
„Поставуваме целосна хидрантска мрежа таму. Се проверува каде завршиле парите за овој парк. Таму ништо не беше направено, а сериозни пари биле потрошени“, рече Ѓорѓиевски на седницата на Советот на Град Скопје, одговарајќи на советнички прашања.
Паркот се простира на околу 72.000 квадратни метри, а според најавите ќе содржи повеќе рекреативни и спортски содржини, вклучително и спортски терени, со што треба да се надополни недостигот од вакви простори во овој дел од градот.
Градоначалникот посочи дека со уредувањето на просторот се создава заштитено зелено подрачје и се спречува негово идно пренаменување.
„Со ова го заштитуваме просторот, на некој после нас да не му текне да нацрта маркици таму. Имаше шпекулации дека тука ќе имало ‘Скопје на вода’, но еве се виде дека нема да има згради туку парк“, додаде Ѓорѓиевски.
Тој се осврна и на состојбата со зеленилото во други делови од Скопје, посочувајќи дека на повеќе локации тревата и дрвјата се сушат поради недостиг од хидрантска мрежа. Според него, во дел од случаите било засадено зеленило без истовремено да се обезбеди соодветен систем за наводнување.
