И во текот на 2026 година продолжуваат работите на изградбата на новиот надвозник во Солун, поради што повремено ќе има измени во режимот на сообраќај на делови од обиколницата околу градот. Иако најголемиот дел од времето сообраќајот се одвива непречено, грчките власти повремено воведуваат ноќни или викенд-затворања на одредени делници, а возилата се пренасочуваат по алтернативни правци.
Обиколницата околу Солун е една од најважните транзитни рути за туристите кои преку граничниот премин Евзони патуваат кон Халкидики и туристичките места во околината на Солун. Затоа, секоја промена во сообраќајот предизвикува голем интерес кај патниците.
Возачите кои патуваат кон Касандра, Ситонија, Неа Флогита, Неа Каликратија, Переја, Аја Триада и Неи Епиватес најчесто ќе треба да ја користат обиколницата околу Солун или да минуваат низ градот.
Од друга страна, патниците кои се упатуваат кон Кавала, Тасос, Атос, Лефкада, Парга, Сивота, Крф, Кефалонија или кон Олимписката ривиера – Паралија, Олимпик Бич, Лептокарија, Платамон, Неи Пори и Литохоро – можат да ги избегнат обиколницата и центарот на Солун, користејќи други автопатски правци.
За оние што во Грција влегуваат преку граничниот премин Дојран, препораката е при патување кон Халкидики да го користат источниот дел од обиколницата, каде што вообичаено има помал сообраќаен метеж отколку на западниот дел.
Грчките власти советуваат возачите да избегнуваат минување низ обиколницата во периодите со најголема фреквенција на возила – од 7:00 до 10:30 часот наутро и од 15:00 до 19:00 часот попладне. Во саботите, особено по 10:00 часот, се очекува дополнително зголемување на сообраќајот во правец кон Халкидики, кога голем број жители на Солун заминуваат на викенд.
Досегашното искуство покажува дека и покрај градежните активности, во текот на јули и август не биле забележани поголеми застои предизвикани од работите. Во случај на привремено затворање на одредени делници, на располагање се неколку алтернативни правци низ самиот град.
Како алтернатива на обиколницата, возачите можат да минуваат и низ центарот на Солун, преку улиците „Егнација“ и „Никис“, покрај морето. Според локалните власти, улицата „Егнација“ веќе е целосно расчистена од градежни работи и сите сообраќајни ленти се повторно во функција. На улицата „Никис“ и булеварот „Цимиски“ полицијата постојано го регулира сообраќајот и не дозволува непрописно запирање на возилата со цел да се обезбеди подобар проток.
Проектот за надвозникот претставува најголем инфраструктурен зафат во северниот дел на Грција во последните децении. Предвидена е изградба на околу 13 километри нов пат, од кои осум километри ќе бидат надвозник, како и девет клучки, десет надпатници и три тунели. Работите започнаа во 2023 година, најинтензивната фаза е планирана за 2026 година, а завршувањето на целиот проект се очекува до крајот на 2027 година.
Со реализацијата на проектот, Солун ќе добие нов бесплатен автопат што треба значително да го намали сообраќајниот метеж, да го олесни пристапот кон аеродромот, Халкидики и автопатот „Егнација Одос“, како и значително да ја подобри безбедноста на сообраќајот.
