Паузите го потрошија времето за опозициски пратенички прашања на денешната седница на Собранието

Седницата на Собранието на Македонија посветена на опозициски пратенички прашања заврши без поставено прашање, откако опозицијата и владејачкото мнозинство побараа по еден час пауза, со што беа потрошени двата часа предвидени за оваа намена.

Првата пауза ја побара координаторката на пратеничката група на ДУИ, Рина Ајдари, со барање претседателот на Собранието, Африм Гаши, да обезбеди присуство на министрите во пленарната сала.

— реклама —

По завршувањето на паузата, пратеникот од ЗНАМ, Даниел Стојчевски, побара процедурално обраќање, што предизвика реакции од опозициските пратеници.

— реклама —

„Што ти е гајле тебе за што побарав процедурално?“ им одговори Стојчевски на довикувањата од опозицијата.

Тој се повика на членот 38 од собранискиот Деловник, кој го уредува правото на пратениците да поставуваат прашања до премиерот, министрите и другите носители на јавни функции.

— реклама —

„Ние сме единствената држава во светот каде што опозицијата бара пауза на инструмент наменет за опозицијата. Тука сме, тука се и министрите и замениците, а повторно се бара пауза. Користете ги пратеничките прашања, за тоа имате одговорност пред граѓаните кои ве избрале“, рече Стојчевски.

— реклама —

Потоа и тој побара едночасовна пауза, изразувајќи надеж дека опозицијата ќе биде подготвена за следната седница.

Неговото барање предизвика негодување кај опозициските пратеници, а претседателот на Собранието, Африм Гаши, соопшти дека работата ќе продолжи со останатите точки од дневниот ред.