Кина ги отфрли како „чисти измислици“ обвинувањата на американскиот претседател Доналд Трамп дека Пекинг се вмешал во претседателските избори во Соединетите Американски Држави во 2020 година.
Трамп во своето обраќање повторно тврдеше дека Кина незаконски дошла до околу 220 милиони американски избирачки досиеја, кои содржеле имиња, адреси и други податоци што се користат при регистрацијата на гласачите, како и дека се обидела да фалсификува гласачки ливчиња во корист на Џо Бајден.
На овие обвинувања одговори портпаролот на кинеското Министерство за надворешни работи, Лин Џијан, кој изјави дека станува збор за „чисти измислици и злонамерни клевети“, додавајќи дека ваквите тврдења одамна се покажале како неосновани.
„Кина не е заинтересирана за американските избори и никогаш не се мешала во нив“, изјави Лин, додавајќи дека меѓународната заедница добро знае која држава најчесто се вмешува во внатрешните работи на други земји.
Тој истовремено ги повика американските власти да престанат со, како што рече, неоснованите обвинувања кон Кина, да не ја користат земјата како политичко прашање во изборните кампањи и да работат на подобрување на односите меѓу Пекинг и Вашингтон.
Трамп и претходно повеќепати тврдеше дека Џо Бајден ги добил претседателските избори во 2020 година преку изборна измама, но за таквите обвинувања никогаш не беа презентирани докази. Во меѓувреме, беа поднесени повеќе од 60 судски тужби, при што не беше утврдена изборна измама што би можела да влијае врз конечниот резултат. И претставници од администрацијата на Трамп во повеќе наврати ги отфрлија ваквите тврдења.
