Пензиите на 11.000 пензионери во Алта банка се исплатени, за 1.500 ќе има посебни шалтери, тврди владината портпаролка Митева

Пензиите на околу 11.000 пензионери кои имаат сметки во Алта банка АД Битола биле исплатени уште во петокот, а за 1.500 пензионери кои, според изјавата на Марија Митева, немаат платежни картички, ќе бидат обезбедени посебни шалтери за подигнување на средствата. Ова го изјави претседателката на Унијата на жени на ВМРО-ДПМНЕ во вечерашното гостување во емисијата „24 Анализа“ на Телевизија 24, обвинувајќи го СДСМ дека шири паника и неточни информации за состојбата со банката.

Митева истакна дека Алта банка АД Битола е самостоен правен субјект регистриран во Македонија и дека надлежните институции реагирале навремено по случувањата со банката во Србија.

„Кога вие имате една ситуација којашто се случила во соседна држава на посебно правно лице, независно од ова правно лице коешто е регистрирано во Република Македонија, вие мора да реагирате промптно и да се обидете да најдете решенија како да ги анулирате несаканите состојби, а се со цел да ја задржите стабилноста и она што значи еден стабилен банкарски и монетарен систем. За мене, и монетарната политика, но и банкарскиот систем, можеби е прашање од национална безбедност“, рече Митева.

— реклама —

Таа го критикуваше СДСМ за бројните прес-конференции и соопштенија поврзани со Алта банка, оценувајќи дека опозицијата ја користи ситуацијата за политички напади.

„Ниту ние го минимизираме проблемот, ниту го ставаме некаде на страна, но вие ја максимизирате цела таа состојба којашто се случува преку лажни вести, преку неточни информации“, изјави Митева.

— реклама —

Според неа, тврдењата дека правните лица нема да можат да располагаат со своите средства биле побиени со објавувањето на решението во „Службен весник“.

Митева посебно се осврна на исплатата на пензиите, наведувајќи дека гувернерот на Народната банка потврдил оти средствата биле исплатени уште во петокот.

„Можевме да го слушнеме денес гувернерот којшто вели дека пензиите на тие 11.000 пензионери коишто имаат трансакциски сметки во Алта Банка, се исплатени уште во петокот“, рече таа.

— реклама —

За пензионерите кои немаат платежни картички, Митева најави посебно решение.

„Еве јас ќе ви одговорам, 1.500 од нив немаат трансакциски сметки, за нив ќе бидат отворени шалтери и ќе биде овозможено да ги подигнат средствата“, изјави Митева.

— реклама —

Таа побара СДСМ да преземе одговорност за информациите што ги пласира во јавноста, оценувајќи дека опозицијата и претходно изнесувала предупредувања кои, според неа, не се оствариле.

„Дали вие, конечно, како политичка партија, не само во овој случај, ќе преземете одговорност за тоа што го зборувате?“, праша Митева.

Изјавите доаѓаат по одлуката на Народната банка да воведе привремена администрација во Алта банка АД Битола поради случувањата со нејзиниот акционер во Србија. Народната банка претходно соопшти дека македонската банка е ликвидна и високо капитализирана и дека мерките имаат цел да ги заштитат интересите на депонентите и стабилноста на банкарскиот систем.