Перчо Божиновски: Младите охриѓани со три проекти ќе го претставуваат градот на Националниот ЛАПСИ форум

Три младински проектни идеи од Охрид ќе го претставуваат градот на Националниот ЛАПСИ форум, откако беа избрани меѓу петте предлози презентирани во рамките на проектот „ЛАПСИ – Локални активни платформи за социјална инклузија“.

— реклама —

Како што информира Перчо Божиновски, презентациите се одржале во Младинскиот центар, во организација на „Институт ОХРИД“, пред комисија на локалната самоуправа, во која учествувале и Божиновски, советничката Билјана Коталески и Стефан Здравевски од Секторот за туризам и локален економски развој.

— реклама —

— реклама —

Во активноста учествувале пет тима од сите четири средни училишта во Охрид. Учениците ги истражувале потребите на локалната заедница, анализирале конкретни проблеми и развивале предлози за нивно решавање.

Првото место го освоија учениците од ОСУ „Св. Климент Охридски“ со проектот „Охрид на големо платно“, додека второто и третото место им припаднаа на учениците од ОЕМУЦ „Св. Наум Охридски“ со идеите „ЕКО Канти“ и „Пријави проблем низ градот“.

— реклама —

Проектот има цел да го поттикне активното учество на младите во општествените процеси, да ги охрабри да предлагаат иновативни решенија за локалните предизвици и да го вклучи нивниот глас во креирањето на јавните политики.