Кремљ ги демантираше шпекулациите дека српскиот претседател Александар Вучиќ пренел порака од рускиот претседател Владимир Путин до украинскиот претседател Володимир Зеленски за време на неговата посета на Киев.
Портпаролот на Кремљ, Дмитриј Песков, изјави дека Москва не испратила никакви пораки преку Вучиќ.
„Не, не пренесовме никакви пораки“, изјави Песков, одговарајќи на новинарско прашање дали руската страна му испратила порака на Зеленски преку српскиот претседател.
Осврнувајќи се на можноста Србија да посредува во украинскиот конфликт, Песков нагласи дека Белград досега не бил вклучен во какви било посреднички напори.
„До овој момент Србија не беше вклучена во посредничките напори за решавање на украинскиот конфликт“, рече тој, одговарајќи на прашањето дали Москва гледа можност Србија да стане посредник во контактите не само со Киев, туку и со Европската Унија.
Претходно денеска, српскиот претседател Александар Вучиќ соопшти дека пристигнал во Киев, каде што учествува на Самитот „Југоисточна Европа – Украина“, а предвидена е и средба со украинскиот претседател Володимир Зеленски.
Вучиќ уште во март 2022 година го понуди Белград како неутрална локација за мировни преговори меѓу Русија и Украина, истакнувајќи дека Србија не сака да се меша во конфликтот, но е подготвена да биде домаќин доколку двете страни проценат дека тоа е најсоодветното место за дијалог.
