Песков ги отфрла обвинувањата дека Русија би го нападнала НАТО преку Белорусија

Кремљ денеска ги отфрли тврдењата на украинскиот претседател Володимир Зеленски дека Русија разгледува можност за напад врз некоја членка на НАТО од територијата на Белорусија.

— реклама —

Зеленски во петокот изјави дека Русија се обидува подлабоко да ја вовлече Белорусија во војната во Украина и дека разгледува планови за напад врз северниот дел на Украина или врз некоја земја членка на НАТО од белоруска територија.

„Таквата изјава не е ништо друго освен обид за дополнително поттикнување тензии со цел продолжување на војната и ескалација. Не сметаме дека таквата изјава заслужува каков било коментар“, изјави портпаролот на Кремљ, Дмитриј Песков.

— реклама —

Белорусија на југ граничи со Украина, а на север и запад со членките на НАТО – Полска, Литванија и Летонија.

— реклама —

Властите во Минск ѝ дозволија на Русија да ја користи белоруската територија како појдовна точка за инвазијата врз Украина во 2022 година, а во земјата е распоредено и руско тактичко нуклеарно оружје.

Белоруското Министерство за одбрана денеска соопшти дека вооружените сили на земјата, во соработка со Русија, започнале воена вежба за проверка на подготвеноста за распоредување нуклеарно оружје.

— реклама —

Во соопштението се наведува дека вежбата не е насочена против ниту една држава и не претставува безбедносна закана за регионот.