Рускиот претседател Владимир Путин е подготвен да преговара „со сите“, вклучително и со европските држави, соопшти Кремљ, откако британскиот весник Фајненшл тајмс објави дека раководството на Европската Унија се подготвува за можни разговори.
Според весникот, промената на ставот на Европската Унија била поттикната од незадоволството од преговорите за завршување на војната во Украина, кои ги предводи американскиот претседател Доналд Трамп.
Претседателот на Европскиот совет, Антонио Коста, изјавил дека верува оти постои „потенцијал“ за разговори меѓу Европската Унија и Путин и дека за тоа има поддршка и од украинскиот претседател Володимир Зеленски.
Портпаролот на Кремљ, Дмитриј Песков, изјавил дека Путин повеќепати повторил дека е подготвен за преговори.
„Ќе бидеме подготвени да напредуваме во дијалогот онолку колку што за тоа се подготвени Европејците. Сепак, како што Путин веќе нагласи, ние нема да иницираме такви контакти по ставовите што ги зазедоа Европејците“, изјавил Песков.
Москва смета дека европските влади треба да го направат првиот чекор, бидејќи токму тие ги прекинале контактите со Русија во 2022 година по почетокот на војната во Украина.
„Руската страна не беше иницијатор на целосниот прекин на односите со Европската Унија“, рекол Песков. „Тоа го покренаа Брисел и одделни европски престолнини.“
Европските лидери претходно изјавуваа дека Русија мора да биде поразена во Украина, а Путин го опишуваа како воен злосторник и автократ кој, според нивните тврдења, би можел еден ден да нападне и членка на НАТО доколку му се дозволи да победи.
