Пет часа во авион, па паника и интервенција на полицијата: Лет од Крит за Солун доцнел поради технички проблем

Лет од грчкиот остров Крит кон Солун доцнел околу пет часа поради технички проблем со авионот, а долгото чекање предизвикало незадоволство, паника и интервенција на полицијата на аеродромот во Ханија.

Авионот „Боинг 737“ со 183 патници требало да полета во 16:40 часот од аеродромот „Даскалогианис“. Меѓутоа, при движењето по пистата се појавил технички проблем, поради што пилотот одлучил да го врати авионот на паркинг-позицијата.

— реклама —

На местото пристигнале техничари кои со часови го проверувале авионот. При повторниот обид за стартување на моторите, инструментите повторно покажале проблем, поради што полетувањето дополнително било одложено, објави грчкиот јавен сервис ЕРТ.

Според информациите, патниците во авионот поминале околу пет часа, што предизвикало големо незадоволство. Дополнителна нервоза предизвикала и информацијата дека за вода требало да платат.

— реклама —

Откако конечно било дадено одобрение за полетување и авионот повторно почнал да се движи по пистата, дел од патниците бурно реагирале и кажале дека не сакаат да продолжат со летот.

— реклама —

Настанала голема гужва и расправија, а една жена се онесвестила, додека друга доживеала напад на паника. На аеродромот била повикана полиција за да ја смири ситуацијата.

На крајот, 25 патници одлучиле да го напуштат авионот. При влегувањето во автобус, една жена ја повредила ногата, по што интервенирала Итната медицинска помош и ја пренела во болница.

Останатите патници што го напуштиле летот се упатиле кон градот Ханија, додека другите продолжиле со патувањето.

Авионот конечно полетал во 21:50 часот, со околу пет часа задоцнување.