Пет земји бараат дополнителна проверка пред ново напредување на Црна Гора кон ЕУ

Холандија побара пауза во процесот на натамошна интеграција на Црна Гора во Европската Унија, со барање за дополнителна анализа и доследна примена на поставените стандарди. На барањето, според подгоричкиот „Дан“, му се придружиле Хрватска, Естонија, Литванија и Латвија.

— реклама —

Петте земји инсистираат на детална проверка на исполнетоста на клучните критериуми пред да бидат донесени нови одлуки. Од Брисел засега нема јасен рок кога би можело да продолжи процесот на затворање на поглавјата и да биде закажана нова Меѓувладина конференција.

— реклама —

Црна Гора досега има затворено 18 од вкупно 33 преговарачки поглавја. Последната Меѓувладина конференција со затворање поглавја се одржа во јули.

Хрватска, пак, досега даде согласност за затворање на речиси сите поглавја, но има резерви кон поглавјето 14, кое се однесува на транспортната политика. Поглавјето 31, поврзано со надворешната, безбедносната и одбранбената политика, е блокирано веќе две години.

— реклама —

Пред Европската комисија во моментов се девет преговарачки позиции, а црногорската министерка за европски прашања Маида Горчевиќ најави дека до крајот на годината ќе бидат испратени и позициите за преостанатите пет поглавја.

Според „Дан“, најоптимистичкото сценарио е следната Меѓувладина конференција да се одржи во средината на октомври во Луксембург. Сепак, актуелните разлики меѓу земјите членки оставаат неизвесност околу темпото на натамошниот напредок.