Петар Павел: Руските дронови влегуваат во НАТО-простор, Путин ја тестира решителноста на Алијансата

Чешкиот претседател Петар Павел изјави дека Русија во повеќе наврати го повредила воздушниот простор на НАТО со авиони и дронови, целејќи да ја тестира решителноста на Алијансата во однос на руската агресија. Во интервју за британскиот „Сандеј тајмс“, Павел порача дека Европа мора да остане единствена и цврста во односот кон Москва.

— реклама —

„Доколку дозволиме Русија да излезе како победник од овој конфликт, тогаш сите сме поразени“, нагласи чешкиот претседател, предупредувајќи дека секое попуштање би било опасен сигнал за Кремљ.

— реклама —

— реклама —

Павел се осврна и на информациите за тајни преговори меѓу Русија и САД минатиот месец, во кои наводно бил разгледуван предлог за одземање украинска територија како дел од потенцијален мировен договор. Таквиот пристап, оцени тој, премногу потсетува на Минхенскиот договор од 1938 година, со кој тогашните европски сили прифатија отстапување на делови од Чехословачка на нацистичка Германија – потег што историски се смета за вовед во уште поголема катастрофа.

„Историјата нè учи дека отстапките пред агресорот не носат мир, туку само поголем ризик и подлабоки конфликти“, изјави Павел, повикувајќи ја Европа да не повторува грешки од минатото и да остане доследна во поддршката за Украина.