Петер Маѓар: Јавниот долг е најголемата пречка за воведување на еврото

Намалувањето на јавниот долг претставува најголем предизвик за Унгарија на патот кон воведување на еврото, изјави денеска унгарскиот премиер Петер Маѓар.

— реклама —

Тој оцени дека исполнувањето на критериумите за членство во еврозоната ќе биде особено тешко токму поради високиот јавен долг, но посочи дека дополнителни мерки за штедење не би биле неопходни доколку средствата од Европската Унија се користат поефикасно.

— реклама —

Маѓар истакна и дека буџетскиот дефицит е значително повисок од официјално поставената цел, пренесува „Ројтерс“.

Во меѓувреме, унгарскиот министер за финансии Андраш Карман соопшти дека претстојната ревизија ќе биде основа за измените на буџетот за 2026 година.

— реклама —

Тој нагласи дека исполнувањето на критериумите поврзани со буџетскиот дефицит и јавниот долг ќе биде клучно пред земјата да започне со процесот на приклучување кон механизмот на девизни курсеви ЕРМ-2, кој претставува една од неопходните фази за воведување на еврото.

— реклама —

Унгарија, како членка на Европската Унија, има обврска во иднина да ја прифати заедничката европска валута, но за тоа најпрво треба да ги исполни економските критериуми утврдени од Унијата.