Петмина мажи се уапсени во Англија под сомнение за кривични дела поврзани со експлозиви и подготовка на терористички чин, откако биле забележани три сомнителни возила кои се движеле кон воздухопловната база РАФ Ферфорд во Глостершир.
Полицијата била известена околу 00:45 часот за возилата, по што вооружени полициски службеници ги привеле петтемина во областа Велфорд. Тие најпрво биле уапсени под сомнение за прекршување на Законот за експлозиви, а потоа и под сомнение за подготовка на терористички чин.
Поради инцидентот, околу 85 домаќинства во близина на базата биле евакуирани. На местото биле испратени антитерористички единици, како и тим на Британската армија за деактивирање бомби.
РАФ Ферфорд долго време се користи како истурена оперативна локација од американската војска. По почетокот на американско-израелската војна против Иран на 28 февруари, британската влада ѝ дозволила на американската војска да ја користи базата за напади врз ирански ракетни локации.
Иран претходно соопшти дека бомбардерите што полетувале од Ферфорд биле користени за напади надвор од првично утврдениот опсег на дејствување. Военото воздухопловство на САД по инцидентот соопшти дека „останува на штрек“.
Британската полиција засега не ги соопшти националностите на уапсените. Помошник-началникот на полицијата Ричард Оконе изјави дека антитерористичките единици го предводат истражувањето и дека се преземаат активности за да се утврди целосната природа на инцидентот.
Снимки од хеликоптер покажуваат роботи како се приближуваат до комбиња на местото на настанот, додека тимот за деактивирање бомби спроведува операции во областа.
