Петти состанок годинава, повторно без резултати: Бугарија и Македонија без договор за заедничко одбележување на годишнината од смртта на Даме Груев

Ниту по последната средба на заедничката мултидисциплинарна експертска комисија за историски и образовни прашања меѓу Македонија и Бугарија не е постигнат напредок. Состанокот, одржан на 5 и 6 ноември во Скопје, завршил без конкретни резултати, објави бугарската новинска агенција БТА.

— реклама —

Според објавените информации, претставниците на двете земји повторно не постигнале договор за начинот на кој Охридската архиепископија треба да биде претставена во учебниците по историја. Без одговор останал и бугарскиот предлог за заедничко одбележување на 120-годишнината од смртта на Дамјан Груев, која се навршува во декември 2026 година.

— реклама —

Наместо тоа, македонската делегација презентирала претходно подготвен текст за заедничко одбележување на отпорот против антисемитизмот, фашизмот и националсоцијализмот, започнат во двете земји во 1941 година. Бугарските претставници го отфрлиле предлогот со образложение дека станува збор за историски процес што се одбележува низ цела Европа и не треба да биде ограничен на билатерална иницијатива.

Според бугарскиот медиум, ваквиот исход е уште еден показател за застојот во работата на комисијата, чија задача е да придонесе за надминување на историските несогласувања и подобрување на односите меѓу двете држави.

— реклама —

Ова е петти состанок на комисијата во 2026 година. Бугарските историчари повторно ги истакнале очекувањата на Европскиот парламент и Европската комисија за постигнување конкретни резултати. Во извештајот на Европската комисија се наведува и дека четирите средби одржани во периодот од септември 2025 до март 2026 година не донеле конкретен напредок.

— реклама —

Следната средба е закажана за почетокот на декември во Софија.