Пијан 19-годишник без возачка дозвола се забил во бетонски столб па во излог во село Пирок, тројца тешко повредени

Тројца сопатници се здобиле со тешки телесни повреди, а уште две лица се повредени во сообраќајна несреќа што се случила во раните утрински часови во селото Пирок, Општина Боговиње. Сообраќајката ја предизвикал 19-годишен возач кој бил под дејство на алкохол и не поседувал возачка дозвола.

— реклама —

Според информациите од Министерството за внатрешни работи, несреќата била пријавена во СВР Тетово на 24 октомври 2026 година, во 04:10 часот.

— реклама —

Во несреќата учествувало патничко возило „Фолксваген поло“ со тетовски регистарски ознаки, управувано од 19-годишниот Д.М. од Пирок. Возилото удрило во бетонски столб од куќа, а потоа и во излог на објект во сопственост на 45-годишен жител на селото.

Тројцата сопатници со иницијали А.Р., А.М. и А.Р. се здобиле со тешки телесни повреди. Другиот сопатник, Е.К., и возачот поминале со телесни повреди. Повредите биле констатирани во Ургентниот центар при Клиничката болница во Тетово.

— реклама —

При увидот, полициската екипа утврдила дека 19-годишникот го управувал возилото под дејство на алкохол. Алкотестирањето покажало 1,29 промили алкохол во крвта, а дополнително било утврдено дека не поседувал возачка дозвола.

Возачот бил лишен од слобода, а од МВР информираат дека по целосното документирање на случајот против него ќе следува соодветна пријава.