Во Аргентина се случи несекојдневна трагедија откако инструктор по летање скокнал од мал авион за време на лет, оставајќи ја својата 22-годишна ученичка сама да го приземји леталото.
Според аргентинското државно обвинителство, телото на 42-годишниот Леандро Андрес Бертацо било пронајдено по инцидентот што се случил минатата сабота во градот Толедо, во централниот дел на земјата.
Ученичката Росарио изјавила дека непосредно пред да скокне, инструкторот ѝ рекол: „Знаеш што треба да правиш, само продолжи“, по што ги извадил слушалките, го откопчал безбедносниот појас, ја отворил вратата и скокнал од авионот.
И покрај шокот, младата пилотка успеала безбедно да ја приземји „Цесна 150“, а леталото не претрпело никакви оштетувања.
Директорот на школата за летање „Flying Parrot Córdoba“, Едуардо Алварез, изјави дека ништо не укажувало дека Бертацо планирал таков чин. Тој посочи дека инструкторот истиот ден претходно имал уште еден тренажен лет со друг ученик.
„Тоа е трагична одлука што ја донел додека бил во авионот со друго лице. Невозможно е да се разбере, но човечкиот ум е многу сложен“, изјави Алварез.
Тој го опиша Бертацо како искусен пилот и инструктор со долгогодишно искуство, кој работел и во соседното Чиле.
Обвинителството најави истрага за да ги утврди сите околности што довеле до неговата смрт.
