Пилотот на „Флајдубаи“, Смит Мачар, и покрај тешките повреди, успеал да ја отвори вратата од пилотската кабина, со што им овозможил на патниците и членовите на екипажот да влезат и да го совладаат напаѓачот, кој претходно го избодел.
Инцидентот се случил на летот од Дубаи кон Тел Авив, со 174 патници. Според израелските официјални лица, вториот пилот, кој наводно е државјанин на Оман, го нападнал Мачар и очигледно се обидел да го урне авионот.
По нападот, авионот за помалку од 30 секунди се спуштил од височина од речиси 4.300 метри. Неколку патници успеале да влезат во кабината и да помогнат во совладувањето на напаѓачот.
Меѓу нив бил и Јанив Хајоун, кој му помогнал на повредениот пилот. Тој подоцна раскажал дека во еден момент ги зграпчил командите и почнал да ги повлекува рачките, по што контролата врз авионот ја презеле други членови на екипажот.
Во пилотската кабина влегол и стоматологот Шота Мусаев, кој за Си-Ен-Ен раскажал дека го затекнал напаѓачот како го избодува Мачар.
„Беше покриен со посекотини – главата, рацете – беа практично исечени, речиси отсечени на два дела. Изгуби многу крв и беше во лоша состојба. Мислам дека ако чекавме уште неколку моменти, ќе го изгубевме“, рекол Мусаев.
Тој помогнал и во совладувањето на напаѓачот, кој бил врзан со кабли за слушалки и пластични патенти.
Во стабилизирањето и слетувањето на авионот помогнале и пилоти кои не биле на должност. Според патникот Алмог Итали, меѓу нив имало и британски пилот. Тие влегле во пилотската кабина, ја презеле контролата и помогнале авионот безбедно да слета во Саудиска Арабија.
Мачар бил пренесен во болница во Табук, каде што бил опериран. Индиските власти соопштија дека е во стабилна состојба и дека се во контакт со неговата сопруга и двете деца.
Храброста на пилотот ја пофали и индискиот премиер Нарендра Моди, кој рече дека и покрај сериозните повреди, Мачар покажал огромна храброст и решителност за да ги заштити животите на другите.
За неговата постапка пофални зборови упати и израелскиот премиер Бенјамин Нетанјаху, кој истакна дека Мачар, иако бил избоден и сериозно повреден, успеал да се спротивстави, да ја отвори вратата од кабината и да им овозможи на патниците и екипажот да го совладаат напаѓачот.
Авијациски експерти изразиле изненадување што авионот успеал да се стабилизира по наглото спуштање. Поранешниот пилот на „Јунајтед ерлајнс“, Стив Аројо, оценил дека станувало збор за сериозно спуштање со силни аеродинамични сили.
Експертот Џеф Гуцети, пак, посочил дека патниците и екипажот имале среќа што авионот останал на доволна височина за да може да се стабилизира.
Мачар се обучувал за пилот во Нов Зеланд во 2008 и 2009 година. Тој претходно раскажал дека првично немал намера да стане пилот, но на 19 години присуствувал на семинар за авијација, по што решил да ја избере оваа професија.
