Фондот на пензиското и инвалидското осигурување на Северна Македонија (ПИОМ) соопшти дека финансиската стабилност на институцијата, редовната исплата на пензиите и непреченото функционирање на пензискиот систем не се доведени во прашање, реагирајќи на конечниот извештај на Државниот завод за ревизија за работењето на Фондот во 2024 година.
Од ПИОМ посочуваат дека станува збор за редовна годишна ревизија, која ги опфаќа финансиското работење, усогласеноста на постапките и управувањето со средствата во текот на целата 2024 година. Притоа, нагласуваат дека во најголемиот дел од ревидираниот период со институцијата управувал раководен кадар именуван од претходната власт, додека актуелното раководство ја презело функцијата во последниот квартал од годината.
Според Фондот, значителен дел од забелешките на ревизорите се однесуваат на состојби кои се провлекуваат со години и биле нотирани и во претходни ревизорски извештаи, поради што се оценуваат како наследени системски слабости.
Од ПИОМ информираат дека по преземањето на функцијата актуелното раководство спровело анализа на ризичните процеси и вовело мерки за надминување на утврдените слабости. Како што наведуваат, во делот на јавните набавки се отстранети забележаните недостатоци, зајакнати се контролните механизми и се унапредени процедурите за планирање и реализација на набавките.
Во соопштението се осврнуваат и на зголемените обврски кон Фондот за здравствено осигурување и вториот пензиски столб, истакнувајќи дека тие се директна последица на историски најголемото зголемување на пензиите. Според ПИОМ, со последните одлуки пензиите биле зголемени за околу 7.000 денари месечно за сите 347.000 пензионери, што на годишно ниво претставува дополнителни средства од околу 30 милијарди денари.
Оттаму потенцираат дека зголемените обврски не се резултат на нарушена финансиска стабилност, туку на повисоките пензии и подобриот животен стандард на пензионерите.
ПИОМ наведува дека целосно ги прифаќа препораките на Државниот завод за ревизија и континуирано работи на нивна имплементација, додавајќи дека здравственото осигурување на пензионерите во ниту еден момент не било доведено во прашање и дека сите корисници непречено ги остваруваат своите права.
