Питон пронајден во училишен двор во Белград, сопственикот тврди дека му испаднал од ранец

Необична глетка ги изненадила вработените во основно училиште во Нов Белград, Србија, каде што во училишниот двор бил пронајден топчест питон долг околу 40 сантиметри. Змијата била отстранета од надлежните, а според неофицијални информации, се јавил и нејзиниот сопственик.

— реклама —

Питонот го забележал маж кој го чистел училишниот двор. Змијата била свиткана во топка и исплашена, а подоцна почнала да шишти кон луѓето кои се обидувале да ја земат.

— реклама —

Училишната управа брзо реагирала и ги повикала надлежните служби, кои ја отстраниле змијата. Бидејќи станувало збор за млад питон, долг околу 40 сантиметри, се појавила загриженост дека во близина можеби има и други змии.

Сепак, според неофицијални информации, се јавил маж кој потврдил дека питонот е негов и дека му испаднал од ранецот.

— реклама —

Топчестиот питон потекнува од западна и централна Африка и е меѓу популарните змии што се чуваат како домашни миленици поради мирниот темперамент. Возрасните единки најчесто достигнуваат должина од 1,2 до 1,5 метри.

Името го добил по одбранбената реакција кога ќе се почувствува загрозен – се свиткува во топка и ја сокрива главата во средината.