Плати до 1.400 евра и пензии над 600 евра во Црна Гора

Платите во Црна Гора од јануари следната година треба да се движат од 1.000 до 1.400 евра, додека пензионерите до крајот на годинава ќе добијат и дополнителен зимски додаток од 100 евра, најави црногорскиот премиер Милојко Спајиќ.

Во видеообраќање објавено на веб-страницата на Владата, Спајиќ рече дека новиот „Евро-модел“ ќе опфати околу 250.000 граѓани, со посебен акцент на најранливите категории.

— реклама —

Според најавата, минималната нето-плата за работниците со основно или пониско образование ќе изнесува 1.000 евра, за оние со средно образование 1.250 евра, а за вработените со високо образование најмалку 1.400 евра месечно.

Спајиќ очекува раст и на платите што се над минималните прагови, посочувајќи дека со намалувањето на даночниот товар врз трудот работниците треба да задржуваат поголем дел од средствата што работодавачите ги издвојуваат за нивните плати.

— реклама —

Тој како пример наведе дека за нето-плата од 1.600 евра, за која работодавачот во моментов издвојува околу 1.980 евра, од јануари работникот би добивал околу 1.870 евра. Дополнителен раст, според неговата најава, би следувал по договор меѓу социјалните партнери за начинот на примена на зголемената вредност на коефициентот за пресметка во јавниот и приватниот сектор.

— реклама —

Премиерот најави и четирикратно годишно усогласување на пензиите. Според неговите проекции, просечната пензија во април би надминала 600 евра, а минималната 500 евра. Во декември пензионерите би добиле и дополнителни 100 евра за покривање на зимските трошоци.

Спајиќ оцени дека реформите се поддржани од растот на потрошувачката и вработеноста, намалувањето на сивата економија, очекуваното враќање на дијаспората и фискалната дисциплина. Како дополнителен извор на приходи тој ја посочи и конфискацијата на незаконски стекнат имот.

Во рамки на идните мерки, црногорскиот премиер најави и воведување данок на празни недвижности, односно куќи и станови што не се користат.

Според неговите проекции, буџетскиот дефицит во следната година ќе изнесува меѓу четири и пет отсто, а до 2028 година треба да се намали на три отсто.