Пленковиќ: Украина покажа дека може да ѝ нанесе штета на Русија

Хрватскиот премиер Андреј Пленковиќ оцени дека западните земји, вклучително и Соединетите Американски Држави, треба да продолжат да ја поддржуваат Украина, коментирајќи ја најавата на американскиот претседател Доналд Трамп за енергетско примирје меѓу Русија и Украина, како и привременото укинување на санкциите за извоз на руски дизел.

„Мислам дека ова заострување не е добро. Сметам дека целиот Запад треба и понатаму да биде со Украина, вклучително и САД“, изјави Пленковиќ по заедничката седница на Претседателството и Националниот одбор на ХДЗ.

— реклама —

Трамп претходно објави дека Русија и Украина се договориле за непосредно енергетско примирје, без да ги соопшти деталите. Украинскиот претседател Володимир Зеленски изјави дека не бил запознаен со таков договор, но дека го поддржува, нагласувајќи дека е важно и Русија да се согласи со него.

Подоцна Зеленски ја обвини Русија дека продолжила со нападите врз украинските енергетски постројки и по објавата на Трамп. Според него, руските сили нападнале електрана во Киев, а потоа и енергетски постројки во Харковската област. Трамп најави и договор со Москва за привремено запирање на санкциите за извоз на руски дизел до 7 април.

Пленковиќ истакна дека Украина е жртва на руската агресија веќе четири и пол години и предупреди на кршењето на меѓународното право и големиот број цивилни жртви.

— реклама —

„Се гаѓаат цивилни цели, згради, училишта, автобуси, а бројот на цивилни жртви е голем. Нормално е Украина, по сè што претрпе од Русија, активно да се брани“, рече хрватскиот премиер.

Тој оцени дека украинската војска ги зајакнува своите способности и дека нападите длабоко на руска територија покажале оти Украина може да ѝ нанесе штета на Русија. Додаде дека украинските напади врз руските енергетски постројки се одговор на руските удари врз енергетската инфраструктура на Украина.

— реклама —

Во однос на единството на Европската Унија во поддршката за Киев, Пленковиќ изрази уверување дека солидарноста меѓу земјите-членки ќе преовлада.

„Повеќето земји и понатаму ѝ даваат поддршка и покажуваат солидарност со Украина. Не гледам дека нешто стратешки се променило“, истакна тој.

Хрватскиот премиер се осврна и на преговорите за новата повеќегодишна финансиска рамка на Европската Унија за периодот од 2028 до 2034 година. Тој оцени дека досегашните пресметки се во согласност со очекувањата на Хрватска.

Загреб ќе инсистира на зачувување на средствата за рамномерен регионален развој и земјоделската политика, како и на тоа земјата да остане нето-примател на средства од европскиот буџет и во следниот седумгодишен период.

„И покрај нашиот економски напредок, сакаме и во следните седум години да бидеме нето-примател на средствата од европските извори и мислам дека ќе го обезбедиме тоа“, заклучи Пленковиќ.