По 20 години, Македонија воведе можност за полагање стручни испити за капетан на брод и бродски екипаж во земјава, со што, според властите, се прави чекор напред во професионализацијата на внатрешната пловидба и зголемување на безбедноста.
Вицепремиерот и министер за транспорт Александар Николоски од Охрид изјави дека досега овие испити се полагале во странство, што претставувало дополнителен товар за кандидатите.
„До сега тие се вршеле во странство, тоа значело дополнително оптеретување на оние кои што се занимаваат со оваа работа и секако значело помала безбедност во пловниот сообраќај“, рече Николоски.
На првиот испит, сертификати добиле еден заповедник на брод за управување со меѓународен пловен пат, осум заповедници за државен пловен пат, еден водач на палуба и шест морнари.
„Особено ми е драго што за прв пат во Македонија имаме женски заповедник на брод, што значи дека ова е работа која може секој да ја извршува“, изјави Николоски.
Тој додаде дека измените имаат за цел да го подигнат нивото на безбедност во пловниот сообраќај и да го регулираат секторот.
Воедно, најави и инфраструктурни зафати во Охрид, посочувајќи дека веќе е набавен нов пловен објект за потребите на Капетанијата, а извршено е и расчистување на пристаништата во Свети Наум и во Охрид.
„Работиме на проект за ново уредување на градскиот кеј, со двете пристаништа – пред хотел Палас и старото градско пристаниште. Последен пат интервенции таму имало во 90-тите години“, рече Николоски.
Според него, проектот ќе значи модернизација на кејот, ставање во функција на пристаништата и подобрување на условите за пловидба, при што се водат разговори и со УНЕСКО за почитување на сите стандарди.
Капетанот на Капетанијата на пристаништата, Илија Аранудоски, ја поздрави мерката и најави засилен инспекциски надзор, упатувајќи апел до граѓаните за навремена регистрација на пловните објекти и почитување на прописите.
