Соединетите Американски Држави ќе ја повлечат својата војска од Ирак до крајот на септември, со што ќе заврши 23-годишното американско воено присуство во земјата, започнато со инвазијата врз режимот на Садам Хусеин во 2003 година.
Одлуката ја потврдија американски и ирачки претставници, а американскиот претседател Доналд Трамп, по средбата во Белата куќа со ирачкиот премиер Али ал-Заиди, изјави дека Вашингтон повеќе не смета дека има потреба од воено присуство во Ирак.
„Повеќе не мислиме дека ни е потребна војска таму. Нашите односи денес се многу пошироки, а американските компании остануваат во Ирак. Ќе помогнеме ако биде потребно, но не веруваме дека тоа ќе биде неопходно“, изјави Трамп.
Ирачкиот премиер потврди дека американските сили ќе ја напуштат земјата до 30 септември, додека американските компании ќе продолжат да работат во Ирак.
Пентагон соопшти дека повлекувањето се спроведува согласно договорот од 2024 година за завршување на американската мисија против Исламската држава. Во изминатите години, одговорноста за безбедноста постепено беше префрлана на ирачката армија, која беше обучувана од американските и коалициските сили.
Американската инвазија врз Ирак започна во март 2003 година, оправдана со тврдењата дека режимот на Садам Хусеин поседува оружје за масовно уништување. Подоцна се покажа дека такво оружје никогаш не било пронајдено.
Во екот на воената операција, во 2007 година, во Ирак беа распоредени повеќе од 170.000 американски војници. По постепеното повлекување, последните борбени единици ја напуштија земјата во 2011 година.
Сепак, по повторното зајакнување на Исламската држава во 2014 година, американските сили се вратија на барање на ирачката влада за да помогнат во обуката на безбедносните сили и во борбата против џихадистите.
Откако коалициските операции официјално завршија во 2021 година, во Ирак останаа околу 2.500 американски војници, ангажирани во обука и заеднички операции со ирачката армија. По договорот од 2024 година, нивниот број дополнително се намали, а по најавеното повлекување ќе остане само мал контингент воени советници и друг персонал.
